აშშ-ის პრეზიდენტ დონალდ ტრამპს რუსეთის წინააღმდეგ სანქციების დაწესებასთან დაკავშირებით ახალი გადაწყვეტილებები არ მიუღია. ამის შესახებ ინფორმაციას „როიტერი“ წყაროებზე დაყრდნობით ავრცელებს.
„აშკარად მცდარია დასკვნა, რომ რუსეთის წინააღმდეგ მომავალი სანქციების შესახებ რაიმე გადაწყვეტილებაა მიღებული. როგორც თვეების განმავლობაში ვამბობდით, ყველა ვარიანტი რჩება განხილვაში პრეზიდენტ ტრამპის დაუღალავი ძალისხმევის მხარდასაჭერად, რომ შეაჩეროს მკვლელობა და მიაღწიოს ხანგრძლივ, მდგრად მშვიდობას“, – განუცხადა წყარომ სააგენტოს.
ამასთან, როგორც სახელმწიფო დეპარტამენტის წარმომადგენელმა „როიტერს“ განუმარტა, ისინი სანქციების შესახებ განცხადებებს წინასწარ არ აკეთებენ.
ცნობისთვის, მანამდე „ბლუმბერგმა“ გაავრცელა ინფორმაცია, რომ ამერიკის შეერთებული შტატები ემზადება სანქციების ახალი პაკეტისთვის რუსეთის ენერგეტიკულ სექტორზე, რათა გაზარდონ ზეწოლა, თუ მოსკოვი უარს იტყვის უკრაინასთან სამშვიდობო შეთანხმებაზე.