სამწუხაროდ, ამერიკის შეერთებული შტატების პრეზიდენტისგან მოვისმინეთ ბოდვა, როდესაც აღნიშნა, თითქოს საზღვაო ბლოკირება იქმნებოდა კარიბის წყლებში უპრეცედენტო განლაგებით, – ამის შესახებ ვენესუელის თავდაცვის მინისტრმა, ვლადიმირ პადრინო ლოპესმა განაცხადა.
მისი თქმით, აშშ-ის პრეზიდენტის განცხადება, რომ ვენესუელელებმა საკუთარი ნავთობის რესურსები მოიპარეს, ვენესუელის „გამარჯვებაა“ და ამერიკის პოლიტიკის რეალურ განზრახვებს ავლენს.
„ტრამპმა თქვა, რომ ჩვენ ქურდები ვართ, რომ მოვიპარეთ ნავთობი, რომელიც აქ, ჩვენს მიწაზეა, რომელიც, მათი თქმით, მათ ეკუთვნით. დღეს ჩვენ შეგვიძლია ვთქვათ, რომ ვენესუელამ მიაღწია გამარჯვებას, გამარჯვებას სიმართლის წინაშე, სიმართლე გამოვლინდა“, – განაცხადა ვლადიმირ პადრინო ლოპესმა.
ცნობისთვის, აშშ-ის პრეზიდენტმა, დონალდ ტრამპმა ვენესუელაში შემავალი და გამავალი ყველა სანქცირებული ნავთობტანკერის სრული ბლოკირების ბრძანება გასცა. მისი თქმით, ვენესუელის პრეზიდენტის, ნიკოლას მადუროს „უკანონო რეჟიმი მოპარული ნავთობის საბადოებიდან ნავთობს საკუთარი თავის დასაფინანსებლად, ნარკოტერორიზმისთვის, ადამიანებით ვაჭრობისთვის, მკვლელობებისა და გატაცებებისთვის იყენებს“. როგორც დონალდ ტრამპმა აღნიშნა, მრავალი მიზეზის გამო, ვენესუელის რეჟიმი უცხოურ ტერორისტულ ორგანიზაციად არის გამოცხადებული.