ევროკომისიის ანგარიში ბრიუსელის აბსოლუტურ ფარისევლობას აჩვენებს, – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს განუცხადა.
პაპუაშვილს კითხვა დაუსვეს ინფორმაციაზე, რომლის თანახმადაც, ევროკომისიამ, უკრაინისა და მოლდოვის შემთხვევაში, გაფართოების შესახებ შეფასების დოკუმენტიდან კორუფციასა და ადამიანის უფლებებზე შეფასებები ამოიღო.
„ანგარიში შეეხება ყველა იმ ქვეყანას, სადაც არის უვიზო მიმოსვლა, ასეთი არის 60 ქვეყანაზე მეტი. ცალკე თავად არის გამოყოფილი კორუფციის, ადამიანის უფლებების საკითხები. ეს თემა ყველა ქვეყანაზეა და, რატომღაც უკრაინასა და მოლდოვაზე ამოღებულია, იმ ორ ქვეყანასთან, რომელშიც ეს პრობლემა განსაკუთრებით ჩანს. შეგახსენებთ უკრაინაში კორუფციულ სკანდალებს. უკრაინის პრეზიდენტის ადმინისტრაციის უმაღლესი თანამდებობის პირები ჩართული იყვნენ კორუფციაში. ფაქტები გამოვლინდა არა უკრაინის შიდა მოკვლევებით, არამედ იყო გარედან ჩარევით, უცხოელები მონაწილეობდნენ ჩხრეკებსა და გამოძიებაში. ასე რომ, უკრაინას არავინ აღარ ეკითხება, ვის დაუჭერენ, ვის არ დაუჭერენ, რა საქმეს გახსნიან და ა.შ. კორუფციის მხრივ, მოლდოვა სად დგას ყველა რეიტინგში, ყველამ კარგად იცის.
ადამიანის უფლებებს რაც შეეხება, ორივე ქვეყანაში ტელევიზიები დახურეს, რომელიც მათ არ მოსწონდათ. პროევროპულობა დღეს გულისხმობს, რომ ვინმეს მოცილება თუ გინდა, დაუძახე რუსი და მერე მოკალი, თუ გინდა ის ადამიანი. ეს არის დღეს ევროპული ღირებულებები“, – განაცხადა შალვა პაპუაშვილმა.