„საქართველოს რკინიგზის“ მასშტაბური მოდერნიზაციის პროექტი დასრულდა – ეს არ არის მხოლოდ ინფრასტრუქტურული განახლება, ეს არის მკაფიო პოლიტიკური და სტრატეგიული არჩევანი, რომელიც საქართველომ გააკეთა საკუთარი მომავლის, ეკონომიკური სიძლიერისა და გლობალურ პროცესებში ღირსეული ადგილის დასამკვიდრებლად, – ამის შესახებ საქართველოს პრემიერ-მინისტრმა ირაკლი კობახიძემ „საქართველოს რკინიგზის“ მოდერნიზაციის პროექტის დასრულებისადმი მიძღვნილ ღონისძიებაზე სიტყვით გამოსვლისას განაცხადა.
მთავრობის მეთაურმა ხაზი გაუსვა „საქართველოს რკინიგზის“ მოდერნიზაციის ისტორიულ მნიშვნელობას და პროექტის ფარგლებში განხორციელებულ უპრეცედენტო მასშტაბის სამუშაოებზე ისაუბრა.
“რკინიგზა ყოველთვის იყო საქართველოს სახელმწიფოებრიობის, ეკონომიკისა და დაკავშირებადობის მნიშვნელოვანი საყრდენი. საქართველოს ახალი ხვალინდელი დღის შესაქმნელად მუხლჩაუხრელად მუშაობს 10 000-ზე მეტი რკინიგზელი. 1872 წელს დაფუძნებული ქართული რკინიგზა დღეს, 153 წლის შემდეგ, ახალ ეტაპზე გადადის – ეტაპზე, რომელიც პასუხობს XXI საუკუნის გამოწვევებს, ტექნოლოგიურ სტანდარტებს და გლობალური ვაჭრობის ახალ რეალობას. პროექტის ფარგლებში აშენდა ახალი ხიდები და გვირაბები, 100-ზე მეტი საინჟინრო ნაგებობა, დაიგო დაახლოებით 100 კილომეტრი ახალი ლიანდაგი და დამონტაჟდა საერთაშორისო სტანდარტების შესაბამისი უსაფრთხოების სისტემები. ეს არის ერთ-ერთი ყველაზე მასშტაბური ინვესტიცია, რაც თანამედროვე საქართველოს სატრანსპორტო სექტორში განხორციელებულა. ამ პროექტის დასრულებით მნიშვნელოვნად გაიზარდა საქართველოს რკინიგზის გამტარუნარიანობა, შემცირდა საოპერაციო ხარჯები, გაძლიერდა უსაფრთხოება და გაუმჯობესდა მგზავრთა კომფორტი. ჩვენ შევქმენით ინფრასტრუქტურა, რომელიც ემსახურება არა მხოლოდ დღევანდელ, არამედ ხვალინდელ ეკონომიკას“, – განაცხადა პრემიერ-მინისტრმა.
მთავრობის მეთაურმა ხაზი გაუსვა საქართველოს როლს შუა დერეფანში და აღნიშნა, რომ მსოფლიოში მიმდინარე გეოპოლიტიკური და ეკონომიკური ტრანსფორმაციის პროცესში, როდესაც მიწოდების ჯაჭვები იცვლება, იზრდება უსაფრთხო, პროგნოზირებადი და სანდო სატრანსპორტო მარშრუტების მნიშვნელობა.
“ამ კონტექსტში საქართველოს როლი გააზრებული და სტრატეგიული გადაწყვეტილებებით გამყარებული უნდა იყოს. სწორედ ამ პოლიტიკის გამოხატულებაა საქართველოს მთავრობის ინიციატივები, ანაკლიის ნავსადგური, რკინიგზის მოდერნიზაცია და აღმოსავლეთ-დასავლეთის საგზაო ინფრასტრუქტურა. ჩვენი მომავალი სწორედ ინტერმოდალური ტრანზიტული ფუნქციაა, რომელიც ყველა სახის ტრანსპორტს ერთიან ეკოსისტემაში მოაქცევს. ამ მხრივ ასევე მნიშვნელოვანია ლოჯისტიკური პროცესების გაციფრულება, რაც აქტიურად მიმდინარეობს. შუა დერეფანი არის არა უბრალოდ ალტერნატიული გზა, არამედ ახალი სტანდარტი ევროპასა და აზიას შორის კავშირისთვის. ჩვენი მიზანია, საქართველო ჩამოყალიბდეს ამ დერეფნის საკვანძო, სანდო და შეუცვლელ რგოლად – ქვეყანად, რომელიც უზრუნველყოფს ტვირთების სწრაფ, უსაფრთხო და უწყვეტ გადაადგილებას. რკინიგზის მოდერნიზაცია სწორედ ამ ხედვის ნაწილია. ის აძლიერებს ჩვენს კონკურენტუნარიანობას, ზრდის სატრანზიტო პოტენციალს და ქმნის მყარ საფუძველს იმ მზარდი სავაჭრო ნაკადების მისაღებად, რომლებიც მომავალ წლებში ევროპასა და აზიას შორის კიდევ უფრო გაიზრდება. ჩვენი ხელისუფლების ამოცანაა, შუა დერეფანი საბოლოოდ იქცეს ყველაზე საიმედო, უსაფრთხო და ეფექტიან კორიდორად რეგიონში. აქტიურად ვმუშაობთ რკინიგზის საოპერაციო პროცესების ოპტიმიზაციაზე, არსებული ადმინისტრაციული ბარიერების აღმოფხვრასა და სერვისების გაციფრულებაზე, რის შედეგადაც, 2026 წლის ზაფხულის სეზონისთვის თბილისი-ბათუმის მონაკვეთზე მგზავრობის დრო ნახევარი საათით შემცირდება”, – განაცხადა ირაკლი კობახიძემ.
პრემიერ-მინისტრმა განსაკუთრებული მადლობა გადაუხადა ყველა ადამიანს, ვინც რკინიგზის მოდერნიზაციის პროექტის განხორციელებაში მონაწილეობდა და აღნიშნა, რომ სწორედ ასეთი ნაბიჯებით შენდება საქართველოს უკეთესი მომავალი.
რკინიგზის მოდერნიზაციის პროექტის მნიშვნელობაზე ისაუბრეს საქართველოს ეკონომიკისა და მდგრადი განვითარების მინისტრმა მარიამ ქვრივიშვილმა და „საქართველოს რკინიგზის“ გენერალურმა დირექტორმა ლაშა აბაშიძემ. ღონისძიებას საქართველოს აღმასრულებელი, საკანონმდებლო და ადგილობრივი ხელისუფლების წარმომადგენლები დაესწრნენ.
