უკრაინის მოკავშირეები ერთმანეთს იანვარში შეხვდებიან, რათა ცეცხლის შეწყვეტის შემდეგ უსაფრთხოების გარანტიების პრინციპები, ადგილზე საჯარისო შენაერთების გაგზავნის ჩათვლით, საბოლოოდ შეათანხმონ. ინფორმაციას Euractiv-ი ელისეს სასახლეზე დაყრდნობით ავრცელებს.
აღნიშნული გადაწყვეტილება მას შემდეგ გახდა ცნობილი, რაც ვაშინგტონმა და კიევმა 20-პუნქტიან გეგმაზე მუშაობა დაასრულეს. ახლა საბოლოო სიტყვა მოსკოვზეა.
საფრანგეთის პრეზიდენტს ემანუელ მაკრონს სურს, რომ უკრაინის მხარდამჭერმა ქვეყნებმა „მსურველთა კოალიციის“ ფარგლებში მომავალ თვეში დეტალები შეათანხმონ, ხოლო მანამდე დასავლეთის ქვეყნები სამშვიდობო გეგმასთან დაკავშირებით მოსკოვის პასუხს დაელოდებიან, აღნიშნავენ ელისეს სასახლეში.
„უკრაინელები, ევროპელები და ამერიკელები თანახმა არიან. ახლა რუსეთმა უნდა გასცეს მკაფიო პასუხი“, – განუცხადა გამოცემას ანონიმურმა წყარომ.
როგორც Euractiv-ი წერს, ათობით ქვეყანა, საფრანგეთისა და დიდი ბრიტანეთის მეთაურობით, თვეების განმავლობაში ამუშავებდა უკრაინის უსაფრთხოების გარანტიების გეგმას, რომელიც გულისხმობს ჯარისკაცების გაგზავნას, ფინანსურ დახმარებას, საბრძოლო მასალების მიწოდებას და სხვა მრავალ ღონისძიებებს, რათა უკრაინა მომავალი რუსული აგრესიისგან დაიცვან.