თურქეთის საგარეო საქმეთა სამინისტრომ, ირანის მხრიდან ბალისტიკური რაკეტის გაშვების შემდეგ ისლამური რესპუბლიკის ელჩი, მოჰამად ჰასან ჰაბიბოლაზადე დაიბარა. ინფორმაციას თურქული მედია ავრცელებს.
მედიის ცნობით, თურქეთის ოფიციალურმა პირებმა ელჩთან საუბრის დროს გამოხატეს შეშფოთება ირანიდან გაშვებული ბალისტიკური რაკეტის გამო და დიპლომატს ახსნა-განმარტება მოსთხოვეს მომხდარ ფაქტთან დაკავშირებით.
თურქული მხარე იმედს გამოთქვამს, რომ ასეთი ინციდენტები აღარ მოხდება. ის ირანულ მხარეს მოუწოდებს, თავი შეიკავოს ისეთი ნაბიჯებისგან, რომლებმაც რეგიონში ისედაც დაძაბული ვითარება, შესაძლოა, უფრო დაძაბონ.
ცნობისთვის, გუშინ თურქეთის თავდაცვის სამინისტრომ განაცხადა, რომ ირანმა თურქეთის მიმართულებით ბალისტიკური რაკეტა გაუშვა, რომელიც ნატოს საჰაერო თავდაცვის სისტემებმა ჩამოაგდეს. ეს ირანის ტერიტორიიდან თურქეთის მიმართულებით რაკეტის გაშვების მეორე შემთხვევაა. პირველი ასეთი ინციდენტი 4 მარტს მოხდა.