აშშ-ის პრეზიდენტმა, დონალდ ტრამპმა განაცხადა, რომ ირანთან ომი შესაძლოა, რამდენიმე დღეში დასრულდეს.
ტრამპის თქმით, აშშ დიდ ნაბიჯებს დგამს ირანში სამხედრო მიზნების შესრულების მიმართულებით.
„ჩვენ მნიშვნელოვან ნაბიჯებს ვდგამთ ჩვენი სამხედრო მიზნის მისაღწევად და ზოგიერთს შეუძლია, თქვას, რომ ისინი თითქმის დასრულებულია. ჩვენ ირანში არსებული ყველა ძალა სრულიად გავანადგურეთ. აშშ-მა იცის ყველა ობიექტი, სადაც ირანი დრონებს აწარმოებს და მათ ერთმანეთის მიყოლებით ურტყამენ. აშშ-ის სამხედროებმა 51 ირანული გემი გაანადგურეს. ირანული დრონების გაშვება 83 პროცენტით შემცირდა. ჩვენ საწყის ვადებს ბევრად ვუსწრებთ“, — განაცხადა ტრამპმა მაიამიში გამართულ პრესკონფერენციაზე.
ტრამპის თქმით, ირანში ომის დაწყებიდან შეერთებულმა შტატებმა 5000-ზე მეტ სამიზნეს დაარტყა.
„ზოგიერთი მათგანი ძალიან მნიშვნელოვანი სამიზნეა, მაგრამ აშშ-ის სამხედროები ზოგიერთ ყველაზე მნიშვნელოვან სამიზნეს იტოვებენ, იმ შემთხვევისთვის, თუ ამის გაკეთება დაგვჭირდება. თუ მათ დავარტყამთ, მათ აღდგენას მრავალი წელი დასჭირდება, რაც ელექტროენერგიის წარმოებას და ბევრ სხვა საკითხს უკავშირდება. მიუხედავად უამრავი შესაძლებლობისა, რომ უარი ეთქვათ ბირთვულ ამბიციებზე, მათ სულ ცოტა ხნის წინ ბატონ უიტკოფს უთხრეს, მოკლედ რომ ვთქვათ – „ჩვენ გვინდა ბირთვული იარაღის შექმნის გაგრძელება““, – განაცხადა ტრამპმა.
აშშ-ის პრეზიდენტის თქმით, თუ აშშ გასულ ზაფხულს ირანის ბირთვულ ობიექტებს არ დაარტყამდა, „მათ ექნებოდათ ბირთვული იარაღი, ისინი მას გამოიყენებდნენ და, სულ მცირე, ისრაელი განადგურდებოდა“.
ამასთან, აშშ-ის პრეზიდენტმა აღნიშნა, რომ თუ აშშ და ისრაელი პირველები არ განახორციელებდნენ დარტყმას, ირანი „ახლო აღმოსავლეთს დაიპყრობდა“.
„ირანი ძალიან ძლიერი ქვეყანაა. ის ახლო აღმოსავლეთს დაიპყრობდა. თუ ჩვენ მათ არ დავარტყამდით, ისინი ახლო აღმოსავლეთს დაიპყრობდნენ“, – განაცხადა ტრამპმა.
ამასთან, ტრამპის თქმით, ირანის თავდასხმა მეზობელ ქვეყნებზე ძალიან სულელური იყო.
ჟურნალისტის კითხვაზე, დასრულდება თუ არა ომი მიმდინარე კვირაში, ტრამპმა უარყოფითად უპასუხა.
ამასთან, აშშ-ის პრეზიდენტის თქმით, ირანის ახალი უზენაესი ლიდერი იმავე პრობლემებს გამოიწვევს, რასაც წინა ლიდერი.
„იმედგაცრუებული ვიყავი, რადგან ვფიქრობ, რომ ეს ქვეყნისთვის იგივე პრობლემის გაგრძელებას გამოიწვევს. ამიტომ იმედგაცრუებული ვიყავი მათი არჩევანის ნახვით“, – განაცხადა ტრამპმა.