ყულევის პორტთან დაკავშირებით ევროკავშირის გადაწყვეტილება ნამდვილად მისასალმებელია, – ამის შესახებ პარლამენტის ევროინტეგრაციის კომიტეტის თავმჯდომარემ, ლევან მახაშვილმა განაცხადა.
მისი თქმით, კიდევ ერთხელ დადასტურდა, რომ საქართველოს ხელისუფლება პატიოსნად, კეთილსინდისიერად ასრულებს თავის პარტნიორებთან აღებულ ვალდებულებებს და, უპირველესად, უკრაინელების მიმართ აღებულ ვალდებულებას.
„მერამდენედ გამოჩნდა, რომ მთელი ის კამპანია, რაც იყო აწეული ამ თემასთან და სანქციებთან დაკავშირებით, სრული სიყალბე და მანიპულაცია იყო, არც მეტი და არც ნაკლები. ჩვენ ამ თემასთან დაკავშირებით ჭორაობა არაერთი ელჩის მხრიდან მოვისმინეთ. დღეს რეალურად გამოჩნდა, ვინაა ჭორიკანა და ვინ – პასუხისმგებლიანი. ასეთ სიტუაციაში რასაც ველით, ამ ადამიანისგან ბოდიშის მოხდაა. სიმართლის აღიარებას ველოდებით, რომ, რეალურად, მისი საუბრები იყო ჭორაობა და საქართველოს ხელისუფლების უსაფუძვლო ცილისწამება. მგონი, ამ წერილით არა მხოლოდ სანქციებთან დაკავშირებით, არამედ ზოგიერთი ელჩის და დიპლომატის ქცევასთან დაკავშირებითაც ყველაფერი ნათელია. უკვე მერამდენედ დასტურდება, რომ ეს ადამიანები არიან ჭორიკანები და მატყუარები. საქართველოს ხელისუფლება თავის საქმეს აკეთებს. ეს პროცესი როდესაც დაიწყო, კითხვები იყო, ამ პორტში რამე ხომ არ ხდება ისეთი. კითხვებს პასუხი გაეცა, არაფერი არ ხდება და მუდმივად ვიქნებით მჭიდროდ ხაზზე დაინტერესებულ მხარეებთან, რომ არა მხოლოდ ჩვენ, არამედ ევროკავშირის მხარეც, ამერიკელებიც და ბრიტანელებიც, დარწმუნებული იყვნენ, რომ ნამდვილად არაფერი ხდება“, – განაცხადა ლევან მახაშვილმა.
ცნობისთვის, ევროკავშირმა საქართველოში მდებარე ყულევის ნავთობის ტერმინალი რუსეთის წინააღმდეგ სანქციების მე-20 პაკეტში არ შეიყვანა. შესაბამისი გადაწყვეტილების შესახებ სანქციების საკითხებში ევროკავშირის სპეციალურმა წარმომადგენელმა, დევიდ ო’სალივანმა საქართველოს საგარეო საქმეთა მინისტრს, მაკა ბოჭორიშვილს წერილით აცნობა.
საქართველოში გერმანიის ელჩმა, პეტერ ფიშერმა 24 თებერვალს ყულევის ტერმინალთან დაკავშირებით განაცხადა, რომ ევროკავშირის მე-20 პაკეტში იყო ყულევის პორტზე საკანონმდებლო წინადადებაც და მტკიცებულებების პაკეტიც.