ევროპა მუშაობს გეგმაზე, რომელიც ნატო-დან აშშ-ის შესაძლო გასვლას უკავშირდება, – ამის შესახებ „უოლ სთრით ჯორნალი“ წერს. როგორც გამოცემა წერს, აშშ-ის პრეზიდენტის, დონალდ ტრამპის, ალიანსიდან შეერთებული შტატების გასვლის მუქარის ფონზე, ევროპელი ოფიციალური პირები სულ უფრო ხშირად განიხილავენ „ევროპული ნატოს“ გეგმას.
საუბარია სარეზერვო გეგმაზე, რომელიც ევროპას მისცემს შესაძლებლობას საკუთარი უსაფრთხოება თავად უზრუნველყოს, ამავე დროს გამოიყენოს ნატო-ს არსებული სამხედრო სტრუქტურები იმ შემთხვევაში, თუ აშშ ბლოკს დატოვებს.
როგორც გამოცემა წერს, აღნიშნულ ნაბიჯს მხარი დაუჭირა გერმანიამ და ამან განსაკუთრებული როლი ითამაშა.
გერმანიის პოზიციის ცვლილებამ გააძლიერა კონსენსუსი სხვა ქვეყნებშიც, მათ შორის დიდ ბრიტანეთში, საფრანგეთში, პოლონეთში, სკანდინავიურ ქვეყნებსა და კანადაში.
როგორც გამოცემა წერს. „ევროპული ნატო-ს“ გეგმაზე მომუშავე ოფიციალური პირები ცდილობენ, ევროპელებს უფრო მნიშვნელოვანი როლი ჰქონდეთ ნატო-ს მართვისა და სარდლობის სისტემაში და ეტაპობრივად შეავსონ ამერიკული სამხედრო რესურსები საკუთარი შესაძლებლობებით. წყაროების თქმით, ეს ინიციატივა არ არის მიმართული ნატოს ჩანაცვლებაზე, მისი მთავარი მიზანია რუსეთის შეკავების შენარჩუნება და სტაბილურობის უზრუნველყოფა იმ შემთხვევაში, თუ ვაშინგტონი ევროპიდან სამხედრო ძალებს გაიყვანს. პირველად ასეთი გეგმები გასულ წელს შემუშავდა, თუმცა პროცესი მნიშვნელოვნად დააჩქარა ტრამპის მკვეთრმა განცხადებებმა, მათ შორის გრენლანდიასთან დაკავშირებულმა საკითხებმაც.
„უოლ სთრით ჯორნალის“ ინფორმაციით, ევროპა უკვე მუშაობს პრაქტიკულ სამხედრო საკითხებზე მაგალითად, ვინ გაუწევს ხელმძღვანელობას საჰაერო და ანტისარაკეტო თავდაცვას, როგორ იმუშავებს ლოგისტიკა და როგორ ჩატარდება ფართომასშტაბიანი სამხედრო წვრთნები ამერიკელი ოფიცრების გარეშე. ფინეთის პრეზიდენტმა, ალექსანდრ სტუბმა, აღნიშნა, რომ მთავარი ამოცანაა პროცესის მართვადი და კონტროლირებადი ფორმით განხორციელება, რათა არ მოხდეს აშშ-ის სწრაფი და ქაოტური გასვლა.
ოფიციალური პირების თქმით, ევროპის ქვეყნებში სამხედრო სავალდებულო სამსახურის აღდგენა გეგმის წარმატებისთვის კიდევ ერთი კრიტიკული ასპექტია. ცნობისთვის, მიმდინარე თვეში, დონალდ ტრამპმა განაცხადა, რომ სერიოზულად განიხილავს ნატო-დან აშშ-ის გასვლის შესაძლებლობას. ხოლო აშშ-ის სახელმწიფო მდივანმა, მარკო რუბიო, აღნიშნა, რომ ირანთან კონფლიქტის დასრულების შემდეგ ვაშინგტონი გადახედავს ალიანსში დარჩენის საჭიროებას.