მარცვლეულის პარტია, რომელიც უკრაინის თქმით, რუსეთმა მოიპარა, ისრაელში არ გადმოიტვირთება, – ამის შესახებ ისრაელის მედიას ისრაელის ოფიციალურმა პირმა განუცხადა.
ისრაელის ოფიციალური პირის თქმით, პანამის დროშის ქვეშ მცურავი „პანორმიტისის“ ბორტზე ხორბლისა და ქერის მიღების შესახებ გადაწყვეტილება ისრაელელმა იმპორტიორმა მიიღო და არა მთავრობის წარმომადგენლებმა.
ტვირთმა ბოლო დღეებში ისრაელსა და უკრაინას შორის სიტყვიერი დაპირისპირება გამოიწვია, უკრაინის საგარეო საქმეთა მინისტრმა, ანდრეი სიბიგამ კი პირობა დადო, რომ კიევი რუსეთის ჩრდილოვანი ფლოტის „ხელშემწყობებს“ პასუხისმგებლობას დააკისრებდა.
„ჩვენ ვაფრთხილებთ ყველა სუბიექტსა და ერს, რომ ჩვენი მარცვლეულის ნებისმიერ ქურდობაზე მკაცრირეაგირება გვექნება“, – განაცხადა ანდრეი სიბიგამ.
შეგახსენებთ, 27 აპრილს უკრაინის საგარეო საქმეთა მინისტრმა, ანდრეი სიბიგამ სოციალურ ქსელში დაწერა, რომ ისრაელის ქალაქ ჰაიფას პორტში შევიდა გემი, რომელიც უკრაინის ოკუპირებული ტერიტორიებიდან მოპარული მარცვლეულით იყო დატვირთული. ამასთან დაკავშირებით უკრაინის საგარეო უწყებაში ისრაელის ელჩი დაიბარეს.
ისრაელის საგარეო საქმეთა მინისტრის, გიდეონ საარის განცხადებით, ბრალდება არ წარმოადგენს მტკიცებულებას და ისრაელს არ წარედგინა შესაბამისი მტკიცებულებები.
უკრაინული მედიის ცნობით, ევროკავშირი განიხილავს სანქციების დაწესებას ისრაელის იმ ფიზიკური და იურიდიული პირების მიმართ, რომლებიც რუსეთს დაეხმარნენ მოპარული უკრაინული მარცვლეულით უკანონო ვაჭრობაში.
უკრაინის საზღვაო მოძრაობის მონიტორინგის სამსახურის ცნობით, საქმე ეხება პანამის დროშის ქვეშ მცურავ გემს, „პანორმიტისს“, რომელიც ჰაიფას მახლობლად მდებარე წყლებში შევიდა. სავარაუდოდ, „პანორმიტისს“ 6 200 ტონაზე მეტი ხორბალი და 19 000 ტონა ქერი გადააქვს.
უკრაინელი საგამოძიებო ჟურნალისტის, კატერინა იარესკოს თქმით, რომელმაც პირველმა გაავრცელა ინფორმაცია, „პანორმიტისი“ მარცვლეულით დატვირთეს უკრაინის ოკუპირებული ტერიტორიებიდან სხვა გემებიდან გადაზიდვის გზით. გემი ჰაიფას პორტისგენ გაემგზავრა რუსეთის კრასნოდარის მხარის „კავკაზის“ პორტიდან.
კიევი მოპარულად მიიჩნევს დონეცკში, ლუგანსკში, ხერსონსა და ზაპორჟიეში წარმოებულ ყველა მარცვლეულს, რომლებსაც რუსეთი 2022 წელს უკრაინაში შეჭრის შემდეგ საკუთარ რეგიონებად მიიჩნევს, ასევე ყირიმში, რომლის ანექსია რუსეთმა 2014 წელს გამოაცხადა.