აზიის განვითარების ბანკის (ADB) 59-ე წლიური შეხვედრის ფარგლებში, საქართველოს ფინანსთა მინისტრი ლაშა ხუციშვილი ბანკის ალტერნატიულ აღმასრულებელ დირექტორს, ლიზა რაითს შეხვდა. ინფორმაციას ფინანსთა სამინისტრო ავრცელებს.
სამინისტროს ცნობით, შეხვედრას დაესწრნენ ფინანსთა მინისტრის მოადგილე ეკატერინე გუნცაძე და ბანკის ალტერნატიული აღმასრულებელი დირექტორის მრჩეველი ეველინ ლამი.
მხარეებმა ისაუბრეს საქართველოსა და აზიის განვითარების ბანკს შორის პარტნიორობის საკითხებზე.
ფინანსთა მინისტრმა ბანკის ალტერნატიულ აღმასრულებელ დირექტორს მადლობა გადაუხადა მრავალწლიანი წარმატებული ურთიერთობებისთვის და ხაზი გაუსვა აზიის განვითარების ბანკთან თანამშრომლობის მნიშვნელობას.
ყურადღება გამახვილდა საერთაშორისო მასშტაბის ინფრასტრუქტურულ პროექტებზე, რომლებსაც საკვანძო როლი აქვთ, როგორც საქართველოს, ისე რეგიონის განვითარებაში.
შეხვედრაზე ხაზი გაესვა ეკონომიკური და ფისკალური მართვის მდგრადობას და საქართველოს მიერ მიღწეულ შედეგებს, როგორც სტრუქტურული, ისე ეკონომიკური რეფორმების მიმართულებით.
როგორც აღინიშნა, აზიის განვითარების ბანკი კვლავ გააგრძელებს ქვეყნის მხარდაჭერას პრიორიტეტული სექტორების დაფინანსების გზით.
წელს, აზიის განვითარების ბანკის წლიურ შეხვედრას უზბეკეთის რესპუბლიკა, ქალაქი სამარყანდი მასპინძლობს.