საერთაშორისო პარტნიორების მხარდაჭერით, საქართველო წინ მიიწევს ეროვნული სივრცითი დაგეგმარებისა და განვითარების კონცეფციის განხორციელების პროცესში, – ამის შესახებ საქართველოს პრემიერ-მინისტრმა ირაკლი კობახიძემ მსოფლიო ურბანული ფორუმის მე-13 სესიაზე სიტყვით გამოსვლისას განაცხადა.
მთავრობის მეთაურის თქმით, რეფორმების ეფექტური განხორციელების უზრუნველსაყოფად, საქართველოს მთავრობამ გააძლიერა ინსტიტუციური კოორდინაცია ცენტრალური მთავრობის სისტემაში შემავალი სპეციალიზებული სააგენტოს მეშვეობით.
„საერთაშორისო პარტნიორების მხარდაჭერით, საქართველო წინ მიიწევს ეროვნული სივრცითი დაგეგმარებისა და განვითარების კონცეფციის განხორციელების პროცესში. ეს მნიშვნელოვანი დოკუმენტი წარმოადგენს საბინაო და ურბანული განვითარების მნიშვნელოვან საფუძველს, უზრუნველყოფს სივრცის ჰარმონიულ ინტეგრაციას, რაც ჩვენს ერთგულებაზე მეტყველებს დაბალანსებული და მდგრადი განვითარების იდეისადმი ქვეყნის ყველა რეგიონში.
ამ რეფორმების ეფექტური განხორციელების უზრუნველსაყოფად, გავაძლიერეთ ინსტიტუციური კოორდინაცია ცენტრალური მთავრობის სისტემაში შემავალი სპეციალიზებული სააგენტოს მეშვეობით. ეს მექანიზმი მხარს უჭერს გრძელვადიან დაგეგმვას და ხელს უწყობს იმის უზრუნველყოფას, რომ ურბანული ტრანსფორმაცია წარიმართოს სტრატეგიული ხედვით, უწყვეტობითა და ეფექტური მმართველობით.
ამავდროულად ვაღიარებთ, რომ მდგრადი ქალაქი არ განისაზღვრება მხოლოდ ფიზიკური ინფრასტრუქტურით. ის უნდა რეაგირებდეს სოციალურ რეალობაზეც, დემოგრაფიულ ცვლილებებსა და ახალ გარემოსდაცვით გამოწვევებზეც. თანამედროვე ურბანული მდგრადობა მოითხოვს ხელმისაწვდომ საჯარო სერვისებს, მდგრად მობილობას, კლიმატის ცვლილებაზე ორიენტირებულ სივრცით მოწყობასა და პოლიტიკას, რომელიც აუმჯობესებს ყველა თემის ცხოვრების ხარისხს“, – განაცხადა პრემიერმა.