ვისურვებდი, რომ სერიოზულად მიუდგნენ ადამიანის უფლებების მდგომარეობას ევროკავშირში ბრიუსელის ჩინოვნიკები. ჩვენ ვხედავთ, რომ დღითიდღე უარესდება ადამიანის უფლებების მდგომარეობა ევროკავშირში, რაც ეხება გამოხატვის თავისუფლებას. კოპენჰაგენი არ არის ცალკეული გამონაკლისი. იგივე სურათი ვიხილეთ ბერლინში, პარიზში, სხვა დედაქალაქებში მშვიდობიანი მიტინგების დარბევის დროს, – განაცხადა შალვა პაპუაშვილმა კოპენჰაგენში აქციის დარბევაზე საუბრისას.
საქართველოს პარლამენტის თავმჯდომარის თქმით, მნიშვნელოვანია, რომ კოპენჰაგენში „განსაკუთრებული ბრუტალურობით“ აქციის დარბევა გამოძიებული იყო, დამნაშავეები კი დაისაჯონ. მან ასევე აღნიშნა, რომ დანიას ადამიანის უფლებების დარღვევის და მაგალითად გრენლანდიის მოსახლეობის იძულებით სტერილიზაცია მოიყვანა და ოჯახებიდან ბავშვების გატაცების სოციალური ექსპერიმენტები მოიყვანა. მისი თქმით, ზოგიერთი გრენლანდიელი პოლიტიკოსი ამ სისტემას გენოციდად აფასებს, თუმცა დღემდე ეს შემთხვევები არ არის გამოძიებული და არც არავინ დასჯილა.
„სამწუხაროა, როდესაც ასეთი ქვეყნიდან წარმომადგენლები შემდეგ სხვებს ესაუბრებიან რაიმე სტანდარტებზე. და ბოლოს, ჩვენ უნდა გავითავისუფლოთ თავი იმ კომპლექსებისგან, რომლებსაც წლების განმავლობაში ცდილობდნენ, რომ მოეხვიათ ქართველი ხალხისთვის, თითქოს ჩვენ ვართ მეორეხარისხოვანი ერი, ბოლომდე არგანვითარებული ერი, თითქოს დანიამ თუ გერმანიამ უნდა გვასწავლოს როგორია სწორი ცხოვრება, როგორია სწორი ევროპელობა, როგორ არის სწორად ქვეყნის შენება. იქით ვასწავლით ყველას, რას ნიშნავს ევროპელობა და ადამიანის უფლებები, ამიტომ უნდა მოვიცილოთ ეს გარედან ძალით მოხვეული კომპლექსი, რომ ჩვენ თითქოს მოწაფეები ვართ და კლასის დამრიგებლებად გვყვანან ზოგიერთი ქვეყნების წარმომადგენლები, რომლებსაც გენოციდთან გათანაბრებული დანაშაულები აქვთ ჩადენილი საკუთარი მოსახლეობის წინააღმდეგ და დღემდე არ აქვთ ეს საკითხები გამოძიებული და არავინაა დასჯილი“, – განაცხადა პაპუაშვილმა.