ლიეტუვის საზღვართან დრონის გამოჩენის გამო ქვეყნის რამდენიმე რაიონში საჰაერო განგაში გამოცხადდა, – ამის შესახებ ნათქვამია ლიეტუვის თავდაცვის სამინისტროს მიერ გავრცელებულ განცხადებაში.
ლიეტუვის თავდაცვის უწყების ინფორმაციით, დრონი, სავარაუდოდ, ბელარუსის მხრიდან მოფრინავდა.
„დაიწყო ნატო-ს ოპერაცია ბალტიის რეგიონის საჰაერო სივრცის პატრულირების მიზნით“, – აცხადებენ ლიეტუვის თავდაცვის სამინისტროში.
საჰაერო განგაშის გამო თავშესაფარში გადაიყვანეს ქვეყნის უმაღლესი თანამდებობის პირები.
გამოცემა „დელფის“ ცნობით, თავშესაფარში იმყოფებოდნენ ლიტუვის პრეზიდენტი, პრემიერ-მინისტრი და სეიმის თავმჯდომარე. ვილნიუსში ასევე შეჩერდა საზოგადოებრივი ტრანსპორტის მოძრაობა.
საფრთხის წითელი დონე გამოცხადებული იყო დედაქალაქისა და ლიეტუვის კიდევ რამდენიმე რაიონში.
მანამდე ლიეტუვის თავდაცვის მინისტრმა, რობერტას კაუნასმა განაცხადა, რომ დრონების საფრთხის შემთხვევაში ლიეტუვამ ისინი ისე უნდა ჩამოაგდოს, როგორც ესტონეთში მოხდა.
ცნობისთვის, ნატო-ს ერთ-ერთმა ავიაგამანადგურებელმა, რომელიც ბალტიის ქვეყნების საჰაერო სივრცეში პატრულირებდა, 19 მაისს ესტონეთის საჯარო სივრცეში უპილოტო საფრენი აპარატი ჩამოაგდო.
„ზუსტად ასეთი მოდელი უნდა მოქმედებდეს ლიეტუვაში. უპილოტო აპარატი, რომელიც ესტონეთის ცაში დაფრინავდა, ნატო-ს საჰაერო პოლიციის გამანადგურებლებმა ჩამოაგდეს. ისინი ლიეტუვაში მდებარე შიაულიაის ავიაბაზიდან აფრინდნენ“, – განაცხადა კაუნასმა.