აშშ-სა და ირანს შორის დაძაბულობის მკვეთრი ესკალაციის ფონზე, რომელმაც ცეცხლის შეწყვეტის შეთანხმების ჩაშლის საფრთხე შექმნა, დონალდ ტრამპის ადმინისტრაციას ამ ეტაპზე არ სურს, რომ ისრაელი ირანის წინააღმდეგ მიმდინარე სამხედრო მოქმედებებში ჩაერთოს. ინფორმაციას CNN-ი ორ ისრაელურ წყაროზე დაყრდნობით ავრცელებს.
წყაროების თქმით, ვაშინგტონი შიშობს, რომ ისრაელის ჩართვამ, შესაძლოა, კონფლიქტზე კონტროლი დააკარგვინოს.
„პრემიერ-მინისტრს [ბენიამინ ნეთანიაჰუს] ნამდვილად სურს, შეუერთდეს აშშ-ის დარტყმებს, თუმცა ამ ეტაპზე შეერთებულ შტატებს არ სურს, ისრაელი ჩართული იყოს“, – განაცხადა ერთ-ერთმა წყარომ.
ამასთან, ისრაელის თავდაცვის მინისტრმა ისრაელ კაცმა გუშინ განაცხადა, რომ ისრაელის თავდაცვის ძალები მზად არიან ირანის წინააღმდეგ სამხედრო ოპერაცია განაახლონ, საჭიროების შემთხვევაში კი ეს დამოუკიდებლად გააკეთონ.
„ისრაელის თავდაცვის ძალები მზადყოფნაში არიან და მზად არიან, განაახლონ კამპანია, აღადგინონ საჰაერო უპირატესობა და დამოუკიდებლად განახორციელონ დარტყმები ირანის წინააღმდეგ საფრთხეების აღმოსაფხვრელად, თუნდაც ეს მესამედ გახდეს საჭირო. თუ დაბრუნება მოგვიწევს, უფრო დიდი ძალით დავბრუნდებით“, – განაცხადა კაცმა ისრაელის სამხედრო ავიაციის ახალი პილოტების გამოშვების ცერემონიაზე.
თუმცა, ერთ-ერთი წყაროს განცხადებით, ისრაელში გავრცელებული შეფასებით, დონალდ ტრამპს არ სურს ირანთან სრულმასშტაბიან ომში დაბრუნება. წყაროს თქმით, აშშ-ის პრეზიდენტი, შესაძლოა, მაქსიმუმ, ირანის პორტების წინააღმდეგ საზღვაო ბლოკადის აღდგენას დათანხმდეს.