ინტერესი არის ძალიან მაღალი როგორც დასავლური კომპანიებიდან, ასევე ჩვენი მეზობელი ქვეყნებიდან, ცენტრალური აზიიდან და შესაბამისად ჩინეთიდან და ჩვენ დარწმუნებულები ვართ, რომ ამ ყველა ინტერესის გათვალისწინებით ანაკლიის ღრმაწყლოვანი პორტი იქნება წარმატებული, – განაცხადა ეკონომიკისა და მდგრადი განვითარების მინისტრის მოადგილემ, თამარ იოსელიანმა გადაცემაში „იმედის კვირა“ ანაკლიის ღრმაწყლოვანი პორტის პროექტთან დაკავშირებით, რომელიც საქართველოს მთავრობის გადაწყვეტილებით ე.წ. „ლენდლორდის“ მოდელით აშენდება.
„ჩვენ გადავხედეთ ანაკლიის განვითარების გენგეგმას, რაც გულისხმობს, რომ პირველი ფაზისთვის საგრძნობლად გავზარდეთ ტვირთგამტარობა. 1,5 მილიონი ტონიდან ჩვენ ნაყარი და გენერალური ტვირთები ავწიეთ დაახლოებით 10 მილიონ ტონამდე, რაც რა თქმა უნდა გვაძლევს იმის თქმის საშუალებას, რომ ზოგადად დერეფანში ძალიან მომატებულია ტვირთბრუნვა და შესაბამისად ამ გაზრდილი ტვირთბრუნვის გათვალისწინებით ჩვენ მზად უნდა დავხვდეთ“, – აღნიშნა თამარ იოსელიანმა.
მინისტრის მოადგილის განმარტებით, მსოფლიოში ნავსადგურების 2/3 სწორედ ამ მოდელით იმართება – ეს არის ამერიკის შეერთებული შტატები, სამხრეთ კორეა, სინგაპური. ასევეა, ევროპის მაგალითები, როგორიც არის საფრანგეთი, როტერდამი და ა.შ
„ჩვენ, რა თქმა უნდა, ვმუშაობთ საერთაშორისო საფინანსო ინსტიტუტებთან იმისათვის, რომ შესაბამისი რესურსი გამოიყოს და სახელმწიფო ბიუჯეტიდანაც იქნება შესაბამისი რესურსი გამოყოფილი იმისათვის, რომ 2029 წლისთვის ჩვენ შევძლოთ პირველი გემის მიღება“, – განაცხადა თამარ იოსელიანმა.