წელს ევროპამ ვლადიმირ პუტინს 6 მილიარდი ევროს მოგება მოუტანა, მას შემდეგ, რაც ციმბირის ერთ-ერთი მთავარი საბადოდან ბუნებრივი აირის რეკორდული მოცულობა შეიძინა, – წერს ბრიტანული გამოცემა The Telegraph-ი.
რუსულმა საექსპორტო ჰაბმა „იამალმა“ მიმდინარე წლის პირველ ნახევარში ევროპელ მყიდველებს თხევადი ბუნებრივი აირის 136 ტანკერი გაუგზავნა, საიდანაც ყველაზე დიდი მოცულობა საფრანგეთში, ბელგიასა და ესპანეთში შევიდა.
თითქმის 10 მილიონი ტონის ოდენობის ამ ტვირთმა გასული წლის ანალოგიურ პერიოდთან შედარებით 16%-იანი ზრდა აჩვენა.
„ენერგიისა და სუფთა ჰაერის კვლევის ცენტრის“ მონაცემებით, უკრაინაში პუტინის შეჭრის შემდეგ, რუსეთი თხევადი ბუნებრივი აირიდან მიღებული შემოსავლების რეკორდულ მაჩვენებელს აღწევს.
ენერგეტიკული კამპანიების ჯგუფ Urgewald-ის წარმომადგენელმა, სებასტიან რეტერსმა ევროპა გააკრიტიკა „იამალიდან“ იმპორტის გაზრდის გამო იმ ფონზე, როდესაც პუტინმა უკრაინაზე საჰაერო იერიშები გააძლიერა.