კატარმა, ეგვიპტემ, პაკისტანმა და სხვა შუამავლებმა აშშ-სა და ირანს საბრძოლო მოქმედებების 10 დღით შეჩერება შესთავაზეს, – წერს Axios-ი წყაროებზე დაყრდნობით. სავარაუდოდ, ამ პერიოდის განმავლობაში ჰორმუზის სრუტეში გემების მოძრაობა აღდგება, აშშ და ირანი კი მისი გრძელვადიანი გამოყენების პირობების განხილვას დაიწყებენ.
გამოცემის ცნობით, აშშ-ის პრეზიდენტის, დონალდ ტრამპის ადმინისტრაცია შუამავლების წინადადებას განიხილავს და ისრაელს მოუწოდა, მოერიდოს ისეთ ნაბიჯებს, რომლებმაც შესაძლოა „დიპლომატიური ფანჯარა დახუროს“.
Axios-ი წერს, რომ ამასთან აშშ მოლაპარაკებების ჩაშლისთვისაც ემზადება და რეგიონში დამატებით სამხედრო ძალებს გზავნის.
მანამდე The Washington Post-ი წერდა, რომ აშშ ირანის წინააღმდეგ უფრო მასშტაბური ოპერაციის ჩატარების შესაძლებლობას განიხილავს. თუმცა გამოცემის წყაროები აღნიშნავდნენ, რომ ამერიკელ სამხედროებს ასეთი ოპერაციის უსაფრთხო მხარდაჭერისთვის ამჟამად საკმარისი რესურსი არ აქვთ.