„იუესეიდი“ პოლიტიკური ორგანიზაცია იყო, რეჟიმების შეცვლის ყველაზე დიდი დამფინანსებელი, – ამის შესახებ მილიარდერმა, ილონ მასკმა ბრიტანულ „ეკონომისტთან“ ინტერვიუში განაცხადა.
კითხვაზე, შეუძლია თუ არა დარწმუნებით თქვას, რომ აფრიკაში არცერთი ბავშვი არ დაღუპულა „იუესეიდის“ დაფინანსების მოულოდნელი შეწყვეტის გამო, მასკმა უპასუხა: „მსგავსი შემთხვევა არ მომხდარა“.
გამოცემის მთავარმა რედაქტორმა, ზანი მინტონ ბედოუმ ხაზი გაუსვა, რომ აივ-ინფექციის საწინააღმდეგო პრეპარატების პროგრამების ერთ ღამეში გაუქმება ადამიანებს სასიცოცხლო მედიკამენტებზე წვდომას უსპობს, რაც ფატალური შედეგით სრულდება. ილონ მასკმა საპასუხოდ აღნიშნა, რომ ეს მხოლოდ იმ შემთხვევაში მოხდებოდა, თუ ალტერნატიული დაფინანსების წყაროები არ მოიძებნებოდა.
„ბილ გეიტსის ფონდს 50 მილიარდი დოლარი აქვს, მაკენზი სკოტის ფონდსაც – ათობით მილიარდი დოლარი. მათ ძალიან სწრაფად შეუძლიათ მოქმედება. ეს თუ არ გააკეთეს, პასუხისმგებლობა მათზეც თანაბრად ნაწილდება“, – განაცხადა ილონ მასკმა.
ჟურნალისტის შენიშვნაზე, რომ მრავალ ქვეყანაში „იუესეიდი“ ჯანდაცვის სისტემების უმსხვილესი დონორი იყო და დაფინანსების მკვეთრმა შეჩერებამ მასშტაბური ჰუმანიტარული კრიზისი გამოიწვია, მასკმა ეს შეფასება კატეგორიულად უარყო.
„ეს განცხადებები მცდარია და სრულ სისულელეს წარმოადგენს. როდესაც თაღლითურ ორგანიზაციებს დაფინანსებას უწყვეტენ, ისინი მანიპულაციისა და თანაგრძნობის გამოსაწვევად სევდიან ისტორიებს იგონებენ, რათა ფულადი ნაკადები აღიდგინონ. სწორედ ამასთან გვაქვს საქმე“, – განაცხადა მასკმა.
მისი განმარტებით, საგარეო დახმარება სრულად არ გაუქმებულა, არამედ სააგენტოს პროგრამების ნაწილი აშშ-ის სახელმწიფო დეპარტამენტის დაქვემდებარებაში გადავიდა.
ინტერვიუს დასასრულს, ბედოუმ აღნიშნა, რომ ტრამპის ადმინისტრაციის მიერ საგარეო დახმარების სისტემის რეფორმა შესაძლოა, აუცილებელიც იყო, თუმცა ცვლილებების სისწრაფემ, დიდი ალბათობით, უამრავი ადამიანის ზედმეტი ტანჯვა და სიკვდილი გამოიწვია.
„ეს სრულიად მცდარია. DOGE-ის (სახელმწიფო ეფექტიანობის დეპარტამენტის) გამო ნული ადამიანი დაიღუპა, ნული“, – დასძინა ილონ მასკმა.