უკრაინულმა უპილოტო საფრენმა აპარატებმა გვიან ღამით რუსეთის ქალაქ ბელგოროდში საწყობებსა და ენერგეტიკულ ინფრასტრუქტურას შეუტიეს. ინფორმაციას უკრაინული მედია ავრცელებს.
აფეთქებები და მასშტაბური ხანძრები დაფიქსირდა ასევე როსტოვის ოლქშიც.
ადგილობრივების ინფორმაციით, ბელგოროდში აფეთქებების სერია მოხდა, რის შედეგადაც ცეცხლი გაუჩნდა ლოგისტიკურ საწყობებსა და ენერგეტიკულ ობიექტებს. ადგილობრივების მიერ გავრცელებულ ვიდეოებში, სავარაუდოდ, ქალაქის სხვადასხვა ნაწილში ხანძრები და აფეთქებებია ასახული.
რეგიონის ხელისუფლების განცხადებით, უკრაინული დრონების მასირებულმა შეტევამ დააზიანა საცხოვრებელი კორპუსი, გაზსადენი და დაუკონკრეტებელი „კომერციული ობიექტი“.
ბელგოროდში საწყობზე განხორციელებული დარტყმის შედეგად ერთი ადამიანი დაშავდა და საავადმყოფოში გადაიყვანეს, განაცხადა ქალაქის მერმა ვალენტინ დემიდოვმა.
ბელგოროდის ოლქის გუბერნატორის მოვალეობის შემსრულებლის ალექსანდრ შუვაევის განცხადებით, რეგიონზე განხორციელებული თავდასხმების შედეგად კიდევ რამდენიმე ადამიანი დაშავდა. მისი თქმით, საგანგებო სამსახურები ქალაქში ხანძრების ლიკვიდაციას განაგრძობენ, ხოლო დაშავებულებს სამედიცინო დახმარება უტარდებათ.
ამავე დროს, სამხრეთ რუსეთში, დონის როსტოვის მცხოვრებლებმა ქალაქის სხვადასხვა უბანში ხანძრებისა და ძლიერი დაკვამლიანების შესახებ განაცხადეს. ამ ეტაპზე უცნობია, თუ რომელი ობიექტები დაიბომბა.