გავრცელებული ინფორმაციით, მილიარდერი ილონ მასკი შუალედურ არჩევნებზე 100-დან 120 მილიონ დოლარამდე დახარჯვას გეგმავს „რესპუბლიკელების“ დასახმარებლად.
ხუთშაბათს გამოქვეყნებული The New York Times-ის სტატიის მიხედვით, მასკმა თავის „სუპერ PAC“-ს მისცა უფლებამოსილება, დახარჯოს 100-დან 120 მილიონ დოლარამდე, სულ მცირე რვა შტატში, ნოემბერში „რესპუბლიკელების“ არჩევის ხელშესაწყობად.
მასკი 2024 წლის საპრეზიდენტო არჩევნების ყველაზე მსხვილი დონორი იყო და მან 240 მილიონ დოლარზე მეტი დახარჯა.
Times-ის ცნობით, მასკის „სუპერ PAC“-ის, America PAC-ის ოფიციალურმა პირებმა ბოლო კვირებში „რესპუბლიკელებს“ აცნობეს თავიანთი ბიუჯეტის შესახებ და დანახარჯების გეგმის ამოქმედება მომავალ თვეში იგეგმება.
ანგარიშში აღნიშნულია, რომ მასკის ჯგუფი პირველ რიგში აპირებს ფოკუსირებას სენატის არჩევნებზე ალასკაში, აიოვაში, მენში, მიჩიგანსა და ოჰაიოში.
გარდა ამისა, მიმდინარეობს მოლაპარაკებები და განიხილება თანხების დახარჯვა ჩრდილოეთ კაროლინაში, ჯორჯიასა და ტეხასში. „სუპერ PAC“-ი ასევე გეგმავს თანხების დახარჯვას წარმომადგენელთა პალატის არჩევნებზე, მათ შორის კალიფორნიაში, უისკონსინსა და ვაშინგტონში.