იტალიის ქალაქ ნეაპოლის მახლობლად, კამპი ფლეგრეის რაიონში, 4,7 მაგნიტუდის სიმძლავრის მიწისძვრა მოხდა, რომელმაც ელექტროენერგიის გათიშვა, მატარებლებისა და მეტროს მოძრაობის შეფერხება და რამდენიმე შენობის დაზიანება გამოიწვია. ინფორმაციას Reuters-ი ავრცელებს.
იტალიის გეოფიზიკისა და ვულკანოლოგიის ეროვნულმა ინსტიტუტმა (INGV) განაცხადა, რომ მიწისძვრა ადგილობრივი დროით პარასკევს, 19:46 საათზე დაფიქსირდა. ეპიცენტრი ნეაპოლის დასავლეთით მდებარე კამპი ფლეგრეის რაიონში, დაახლოებით 3 კილომეტრის სიღრმეზე მდებარეობდა.
იტალიის სახანძრო სამსახურის ინფორმაციით, ნეაპოლსა და მის მიმდებარე ტერიტორიებზე რამდენიმე შენობის მცირე დაზიანების შესახებ ცნობები მიიღეს, თუმცა მაშველებს მოსახლეობის დასახმარებლად ან საევაკუაციო სამუშაოებისთვის დაუყოვნებლივი გამოძახება არ მიუღიათ.
ადგილობრივი ხელისუფლების განცხადებით, უსაფრთხოების მიზნით დროებით შეჩერდა სარკინიგზო და მეტროს მომსახურება.
იტალიური მედიის ცნობით, ეს ერთ-ერთი ყველაზე ძლიერი მიწისძვრა იყო, რაც ამ რაიონში ოდესმე დაფიქსირებულა. ბიძგების დროს რამდენიმე უბანში ადამიანები ქუჩებში გამოვიდნენ.