გერმანიის საგარეო საქმეთა მინისტრმა, ევროპულ კომისიას ესპანურ ანკლავ სეუტაში შექმნილი მიგრაციული კრიზისის ფონზე ევროკავშირის საგარეო საზღვრების დასაცავად ზომების მიღებისკენ მოუწოდა.
იოჰან ვადეფულმა სეუტაში შექმნილ კრიზისს „სიმტკიცის აბსოლუტური გამოცდა“ უწოდა და ევროკომისიას მოუწოდა, გაატაროს ზომები მსგავსი სიტუაციების თავიდან ასაცილებლად.
„სეუტაში ბოლო დღეებში შექმნილი სიტუაცია გახდა სიმტკიცის ნამდვილი გამოცდა, რომელსაც ჩვენ გავუძელით. ამიტომ, ველოდები, რომ ევროპული კომისია საგარეო საზღვრების დაცვას აბსოლუტურ პრიორიტეტს მიანიჭებს, რათა ევროკავშირის შიდა ღია საზღვრების შენგენის სისტემას საფრთხე არ შეექმნას“, – აღნიშნა ვადეფულმა.
მინისტრის მოსაზრებით, ეს კრიზისი ასევე აჩვენებს, თუ რამდენად მნიშვნელოვანია „ერთობლივად და ოპერატიულად დავუპირისპირდეთ დეზინფორმაციას, რომელიც საფრთხეს უქმნის ადამიანის სიცოცხლეს“.
ვადეფულმა ასევე ხაზი გაუსვა, რომ ეფექტური მიგრაციული პოლიტიკა ვერ იმუშავებს მესამე ქვეყნების დახმარების გარეშე და ესპანეთისა და კრიზისის მოგვარების პროცესში მაროკოს თანამშრომლობას მიესალმა.
ირლანდიამ სეუტაში არსებული მიგრაციული კრიზისის განსახილველად ევროკავშირის იუსტიციისა და შინაგან საქმეთა საბჭოს სხდომა სამშაბათს, 4 აგვისტოს მოიწვია.
ბოლო დღეებში ათობით ათასი მიგრანტი მასობრივად შეეცადა მაროკოს ტერიტორიიდან ესპანურ ანკლავ სეუტაში შეღწევას. ადგილობრივი ხელისუფალთა შეფასებით, ქალაქში უკანონოდ შევიდა დაახლოებით 60 ათასი ადამიანი, ხოლო ესპანეთის შინაგან საქმეთა სამინისტრომ 50 ათასზე მეტი პირის შესახებ განაცხადა. 31 ივლისს ესპანეთის ხელისუფლებამ განაცხადა, რომ მიგრანტების უმრავლესობა მაროკოშია დაბრუნებული.