მას შემდეგ, რაც პრეზიდენტმა დონალდ ტრამპმა ჰორმუზის სრუტე „ღიად“ გამოაცხადა, მეორე დღესვე მისი ადმინისტრაციის წარმომადგენლებმა ნავთობსა და საწვავზე ფასების პროგნოზი გაზარდეს, რადგან არსებული შეზღუდვები ამ კრიტიკულ საზღვაო არტერიაში ენერგორესურსების მოძრაობას აფერხებს, – წერს ტელეკომპანია CNN-ი.
ენერგეტიკის დეპარტამენტის საპროგნოზო ორგანოს – ენერგეტიკული ინფორმაციის ადმინისტრაციის (EIA) – ახალი მოლოდინით, ჰორმუზის სრუტის გავლით ენერგორესურსების ტრანზიტი აგვისტოს ბოლომდე შეზღუდული დარჩება.
სამშაბათს EIA-მ ნავთობის გლობალური ეტალონის, Brent-ის 2026 წლის პროგნოზი ბარელზე საშუალოდ 87 დოლარამდე გაზარდა. ეს მაჩვენებელი აღემატება ერთი თვის წინანდელ 82-დოლარიან პროგნოზს და მიმდინარე ნიშნულებთან ახლოსაა.
ოფიციალური პირების ახალი მოლოდინით, წელს ბენზინის საცალო ფასი გალონზე საშუალოდ 3.78 დოლარს მიაღწევს, რაც აღემატება წინა პროგნოზს – 3.64 დოლარს. ომის დაწყებამდე ბენზინის ფასი ქვეყნის მასშტაბით გალონზე 2.98 დოლარს შეადგენდა.
ექსპერტებმა ასევე გაზარდეს 2027 წლის ნავთობისა და ბენზინის ფასების პროგნოზებიც.
EIA-მ მიზეზად „ჰორმუზის სრუტის გავლით ტრანზიტზე არსებული შეზღუდვები“ დაასახელა და დასძინა, რომ ეს პროგნოზი „ეყრდნობა დაშვებას, რომ აღნიშნული შეზღუდვები აგვისტოს ბოლომდე შენარჩუნდება“.