რუსეთის ცის ჩაკეტვის შესახებ უკრაინის მუქარა, თუკი ის ხმამაღლაა გაჟღერებული, „სახელმწიფო ტერორიზმზე განაცხადია“, – ამის შესახებ შანხაის თანამშრომლობის ორგანიზაციის სამიტის შემაჯამებელ პრესკონფერენციაზე რუსეთის პრეზიდენტმა, ვლადიმირ პუტინმა განაცხადა.
მან აღნიშნა, რომ უკრაინა მოლაპარაკებების გამართვის ინიციატივით გამოდის.
„ტერორისტებთან კი მოლაპარაკებებს არ აწარმოებენ“, – განაცხადა პუტინმა. მოგვიანებით, დაზუსტებულ კითხვაზე პასუხისას რუსეთის პრეზიდენტმა თქვა, რომ უკრაინის განცხადებას „არა ტერორიზმად, არამედ ტერორიზმზე განაცხადად“ მიიჩნევს.
„ჩვენ ვნახავთ, როგორ გავცეთ ამას პასუხი, ვიპოვით შესაბამის ინსტრუმენტებს“, – დასძინა პუტინმა.
განცხადება იმის შესახებ, რომ რუსეთის ცა „დე ფაქტო დაიხურება“, უკრაინის პრეზიდენტმა, ვოლოდიმირ ზელენსკიმ გააკეთა. მან აღნიშნა, რომ რუსული ცა „სახიფათო ხდება“. თავისი პოზიციის არგუმენტად მან მიუთითა უპილოტო საფრენი აპარატები, რომლებიც, მისი თქმით, „ისე გამოჩნდებიან [ცაში], რომ ამასთან ანგარიშის გაწევა მოუწევთ“.