ტრანსპორტის სექტორი მრავალმიმართულებიანია და ჩვენ მუდმივად ვუყურებთ მის სხვადასხვა მიმართულებით განვითარებას, – აღნიშნა ეკონომიკისა და მდგრადი განვითარების მინისტრმა, მარიამ ქვრივიშვილმა გადაცემა Business Insider Georgia-ში ტრანსპორტის სექტორზე საუბრისას.
მისი თქმით, სახელმწიფო ტრანსპორტის სექტორს არ უყურებს მხოლოდ როგორც საჰაერო გადაზიდვების, ან მხოლოდ საპორტო გადაზიდვების მიმართულებით.
მინისტრის თქმით, ძალიან მნიშვნელოვანია, რომ სატრანსპორტო ქსელი სხვადასხვა მიმართულებით პარალელურ რეჟიმში განვითარდეს.
„ძალიან დიდი ყურადღება დავუთმეთ და ვუთმობთ მიმდინარე პერიოდშიც საქართველოს რკინიგზის მოდერნიზებას და შემდგომ განვითარებას. იმდენი რამ გაკეთდა უკვე ძალიან ეფექტური ახალი მენეჯმენტის პირობებში. ჩვენი მთავარი ამოცანა არის რამდენიმე: ერთი, რომ გაჯანსაღდეს საქართველოს რკინიგზა, როგორც ორგანიზაცია; მეორე, რომ ხელისუფლებამ და სახელმწიფომ ხელი შეუწყოს საქართველოს რკინიგზას, რომ მოახდინოს მოძრავი შემადგენლობის გაზრდა და გაფართოება იმისთვის, რომ ჩვენმა ქვეყანამ საქართველოს რკინიგზის მეშვეობით შეძლოს და გაატაროს კიდევ უფრო მეტი ტვირთი; და მესამე, უკიდურესად მნიშვნელოვანია, რომ საქართველოს რკინიგზის გამტარუნარიანობის ზრდა იყოს თანხვედრაში საქართველოს საპორტო ინფრასტრუქტურის გამტარუნარიანობასთან“, – განაცხადა მინისტრმა. მისივე თქმით, ეს არის ის მნიშვნელოვანი ერთიანი ხედვა, რომლის განუყოფელი ნაწილი საპორტო, სარკინიგზო, საგზაო ინფრასტრუქტურის განვითარება და, რა თქმა უნდა, საჰაერო ინფრასტრუქტურის განვითარებაა.
„როდესაც ვსაუბრობთ მოკლე, საშუალო და გრძელვადიან განვითარების გეგმაზე – ზოგადად ტრანსპორტისა და ლოგისტიკის სექტორში, ყოველთვის აქცენტს ვაკეთებთ, რომ ყველა მიმართულებით მიმდინარეობს მუშაობა, რადგან წერტილოვნად რომელიმე ერთი მიმართულების განვითარება, არ მოგვცემს ჯამურ იმ დადებით ეფექტს, რომელიც აუცილებლად უნდა მივიღოთ უახლოეს პერიოდში. ამის კვალდაკვალ იცით, რომ ძალიან მსხვილ სამუშაოებს ახორციელებს საქართველოს ინფრასტრუქტურის სამინისტრო იმისთვის, რომ ქვეყანაში განვითარდეს საგზაო ინფრასტრუქტურა, მაგისტრალური გზები, ისევე როგორც შიდა დამაკავშირებელი გზები, რასაც ერთი მხრივ ექნება დიდი, ეფექტი მობილობის გაუმჯობესების თვალსაზრისით, მაგრამ ასეთი ინფრასტრუქტურა პირდაპირპროპორციულად ემსახურება ასევე ჩვენი ქვეყნის, როგორც ტრანზიტული, ლოგისტიკური ჰაბის ფუნქციის გაუმჯობესებას“, – აღნიშნა მარიამ ქვრივიშვილმა.
როგორც მინისტრმა განაცხადა, სატრანსპორტო სექტორის გაძლიერების მიზნით, სახელმწიფო მასშტაბური ინვესტიციის განხორციელებას გეგმავს
„ჩვენ მილიარდი ლარის ინვესტიციას განვახორციელებთ უახლოეს პერიოდში იმისთვის, რომ შევიძინოთ უმნიშვნელოვანესი ინფრასტრუქტურა. ეს იქნება ისტორიული გადაწყვეტილება, ეს არის უკვე ისტორიული გადაწყვეტილება, რომელიც გასული პერიოდის განმავლობაში, ფაქტობრივად გასული წლის ბოლოს ჩვენ მივიღეთ პრემიერ-მინისტრის მხარდაჭერით“, – აღნიშნა მარიამ ქვრივიშვილმა.