ირანმა ბალისტიკური რაკეტების წარმოება განაახლა და ამისთვის მარაგებში არსებული კომპონენტებისა და მიწისქვეშა საწარმოო ობიექტების გამოყენება დაიწყო. ინფორმაციას The Wall Street Journal-ი ავრცელებს.
როგორც გამოცემა იუწყება, აშშ-ისა და ისრაელის მიერ ომის საწყის ეტაპზე ირანის სარაკეტო ობიექტებსა და სამრეწველო ინფრასტრუქტურაზე მიტანილი მასშტაბური დარტყმების მიუხედავად, ირანმა კვლავ დაიწყო როგორც თხევადსაწვავიანი, ისე მყარსაწვავიანი რაკეტების აწყობა. თხევადსაწვავიანი რაკეტები გაშვებამდე ცოტა ხნით ადრე უნდა შეივსოს საწვავით, ხოლო მყარსაწვავიანი რაკეტების წინასწარ შენახვა და საჭიროების შემთხვევაში დაუყოვნებლივ გამოყენებაა შესაძლებელი.
ოფიციალური პირების თქმით, სადაზვერვო მონაცემები ირანის რამდენიმე მიწისქვეშა ობიექტზე, მათ შორის ქვეყნის სამხრეთ-აღმოსავლეთში მდებარე ხოჯირის სარაკეტო საწარმოში მიმდინარე საქმიანობაზე მიუთითებს. მათი თქმით, ირანი ასევე ცდილობს ახალი მიწისქვეშა საწარმოო ობიექტების მოწყობას, რათა მათი ხელახლა დაბომბვა უფრო რთული გახდეს.
ამ ეტაპზე ირანი ახალ რაკეტებს ძირითადად უკვე არსებული კომპონენტებისგან აწყობს და წარმოების მასშტაბი ომამდე არსებულზე გაცილებით მცირეა. აშშ-მა და ისრაელმა დააზიანეს არაერთი სამრეწველო ობიექტი, რომლებიც რაკეტებისა და მათი კომპონენტების წარმოებისთვის იყო საჭირო. ამასთან, საზღვაო ბლოკადამ გაართულა მყარსაწვავიანი რაკეტებისთვის საჭირო ნაწილებისა და ნედლეულის იმპორტი, წერს გამოცემა.
The Wall Street Journal-ი წერს, რომ წარმოების განახლება აჩვენებს, რამდენად რთულია თეირანის სარაკეტო პროგრამის სრულად განადგურება, რაც ომის ერთ-ერთი მთავარი მიზანი იყო, რომელიც აშშ-მა და ისრაელმა 28 თებერვალს დაიწყეს. ამასთან, ეს ირანს საშუალებას აძლევს, გააგრძელოს გამოფიტვის ომში წინააღმდეგობის გაწევა, რომელშიც მისი სარაკეტო მარაგები აშშ-ისა და სპარსეთის ყურის ქვეყნების რაკეტსაწინააღმდეგო სისტემებისთვის განკუთვნილ, თანდათან შემცირებულ მარაგებს უპირისპირდება.
„როდესაც ობიექტები არ იბომბება, შესაძლებელია დაზიანებული ინფრასტრუქტურის აღდგენა, სხვა ქვეყნებიდან ახალი კომპონენტების შეძენა და მათი ობიექტებში შენახვა. უკიდურესად გულუბრყვილო უნდა იყო, რომ იფიქრო, თითქოს ირანი სარაკეტო წარმოების შესაძლებლობებს არ აღადგენს“, – განაცხადა აშშ-ში დაფუძნებული Missile Defense Advocacy Alliance-ის უფროსმა ანალიტიკოსმა ტალ ინბარმა.
თეთრი სახლის წარმომადგენელს პირდაპირ არ უპასუხია კითხვაზე, განაახლა თუ არა თეირანმა ბალისტიკური რაკეტების წარმოება. თუმცა მან განაცხადა, რომ ირანის ბირთვული ობიექტები სრულად განადგურებულია, ხოლო ქვეყნის სამხედრო ძალების შესაძლებლობები მნიშვნელოვნად არის შემცირებული.
„ირანი ახლა უფრო სუსტია, ვიდრე ოდესმე ყოფილა და პრეზიდენტი ტრამპი ირანს ბირთვული იარაღის შექმნის საშუალებას არასდროს მისცემს“, – თქვა თეთრი სახლის წარმომადგენელმა.
პენტაგონის მთავარმა პრესსპიკერმა შონ პარნელმა განაცხადა, რომ აშშ-მა „ირანის დრონების, ბალისტიკური რაკეტებისა და საზღვაო ინდუსტრიული ბაზის 90%-მდე გაანადგურა“ და ირანის შესაძლებლობები, განახორციელოს სარაკეტო და დრონებით შეტევები, „მნიშვნელოვნად შეამცირა“.
ომის საწყის ეტაპზე აშშ-მ და ისრაელმა ირანის სარაკეტო პროგრამა მნიშვნელოვნად დააზიანეს. განხორციელდა ათასობით დარტყმა წარმოების ობიექტებზე, საცავებზე, რაკეტებსა და გამშვებ სისტემებზე. თუმცა ირანმა ამ ზაფხულს შექმნილი შედარებითი სიმშვიდე სამხედრო შესაძლებლობების აღსადგენად გამოიყენა, რადგან მიიჩნევს, რომ ცეცხლის შეწყვეტის შეთანხმების ხანგრძლივად შენარჩუნების შანსი მცირეა, – აღნიშნულია სტატიაში.