აშშ-ის პრეზიდენტი დონალდ ტრამპი დუბლინში ჩავიდა, სადაც ირლანდიის პრეზიდენტსა და პრემიერ-მინისტრს შეხვდება, შემდეგ კი ერთ-ერთ საკუთარ კურორტზე გამართულ გოლფის ტურნირს დაესწრება. ინფორმაციას Reuters-ი ავრცელებს.
სააგენტოს ცნობით, ვიზიტი ტრამპის მიერ ირანთან ომსა და ნოემბრის შუალედურ არჩევნებში „რესპუბლიკური“ პარტიის ძალაუფლების შენარჩუნებაზე ბოლო პერიოდში გაკეთებული აქცენტიდან ერთგვარი გადახვევაა.
ირლანდიის პრეზიდენტთან და პრემიერ-მინისტრთან დაგეგმილი შეხვედრები ოფიციალური სახელმწიფო ვიზიტის ფარგლებში არ იმართება. თუმცა, მიმდინარე კვირაში გამართული „რესპუბლიკური“ პარტიის ყრილობისა და 11 სექტემბრის ტერაქტის 25-ე წლისთავის შემდეგ მოლაპარაკებების დღის წესრიგში შესაძლოა პოლიტიკური თვალსაზრისით მგრძნობიარე საკითხებიც მოხვდეს, მათ შორის ეკონომიკური პრობლემები და ირლანდიის ხელისუფლების შეშფოთება ირანთან ომთან დაკავშირებით, წერს სააგენტო.
ტრამპი ირლანდიაში 48-საათიანი ვიზიტით იმყოფება იმ დროს, როდესაც მისი „რესპუბლიკური“ პარტია ნოემბრის შუალედურ არჩევნებში კონგრესის ორივე პალატაში უმრავლესობის შენარჩუნებისთვის იბრძვის. ირანის კონფლიქტმა ამერიკელ ამომრჩევლებში ეკონომიკური პრობლემების გამო შეშფოთება გააძლიერა, რადგან ომმა ქვეყნის მასშტაბით საწვავის ფასები გაზარდა.
დუბლინის აეროპორტში ტრამპს ირლანდიის ვიცე-პრემიერი და საგარეო საქმეთა მინისტრი დახვდნენ.
დუბლინსა და დასავლეთ ირლანდიაში, დონბეგში, Trump International Golf Links-ის მიმდებარე ტერიტორიაზე, სადაც გოლფის ტურნირი ტარდება, ომისა და ტრამპის წინააღმდეგ საპროტესტო აქციებია დაგეგმილი, იუწყება Reuters-ი.
როგორც Reuters-ი აღნიშნავს, ირლანდია ევროკავშირის ერთ-ერთი ყველაზე პროპალესტინური ქვეყანაა. ივლისში ქვეყანამ კანონი მიიღო, რომელიც ისრაელის მიერ ოკუპირებულ დასავლეთ სანაპიროზე მდებარე დასახლებებიდან საქონლით ვაჭრობას ზღუდავს. კანონი ამერიკელმა კანონმდებლებმა და ირლანდიაში აშშ-ის ელჩმა გააკრიტიკეს.
ირლანდიის პრემიერ-მინისტრი მაიკლ მარტინი აშშ-თან პოლიტიკურ დაპირისპირებას ჯერჯერობით თავს არიდებს.
„ირლანდიასა და შეერთებულ შტატებს შორის ურთიერთობა ეკონომიკური თვალსაზრისით ძალიან მნიშვნელოვანია. ის ორივე მხარისთვის ძალიან, ძალიან მნიშვნელოვანია“, – განაცხადა მარტინმა ჟურნალისტებთან ტრამპის ვიზიტის შეფასებისას.
აღსანიშნავია, რომ დღეს დუბლინში ტრამპი ირლანდიის პრეზიდენტს კეტრინ კონოლის შეხვდება, რომელიც სახელმწიფოს მეთაურად გასულ წელს აირჩიეს. როდესაც ტრამპი პრეზიდენტის რანგში ირლანდიას 2019 წელს ეწვია, კონოლი, რომელიც საგარეო პოლიტიკის საკითხებში ღიად გამოხატული მემარცხენე შეხედულებებით არის ცნობილი, დასავლეთ ირლანდიაში, შენონის აეროპორტთან, ტრამპის წინააღმდეგ საპროტესტო აქციაში მონაწილეობდა.