როდესაც ნავთობი ზეწოლის ქვეშ ექცევა, საწვავის ფასები იზრდება. ვიცი, რას ნიშნავს ეს ფრანგებისთვის, – ამის შესახებ საფრანგეთის პრეზიდენტმა, ემანუელ მაკრონმა განაცხადა.
ემანუელ მაკრონის თქმით, ის, რაც საფრანგეთიდან ათასობით კილომეტრის დაშორებით ხდება, საბოლოოდ ყოველთვის ქვეყნის ყოველდღიურ ცხოვრებაზე აისახება.
„ვმოქმედებ, რათა შევამციროთ დაძაბულობა, დავიცვათ ჩვენი მომარაგება და ფასებზე ზეწოლა შევამსუბუქოთ. ამ კვირის დასაწყისში ერაყის პრემიერ-მინისტრთან გამართული მოლაპარაკებების შემდეგ, დღეს შევხვდი საუდის არაბეთის პრინცს და კატარის ამირას. პრიორიტეტია: ჰორმუზის სრუტეში ნავიგაციის თავისუფლების აღდგენა – ეს ნავთობის ტრანსპორტირებისთვის სასიცოცხლოდ მნიშვნელოვანი საზღვაო გზაა, ჩვენი პარტნიორების ენერგეტიკული ინფრასტრუქტურის დაცვა და ნავთობის წარმოების უზრუნველყოფა. ჩვენი მომარაგების გარანტირება აუცილებელია. ამ საკითხზე ვმუშაობთ ჩვენს კოალიციურ პარტნიორებთან ერთად, რათა ჰორმუზის სრუტეში ნავიგაციის თავისუფლება უზრუნველყოფილი იყოს. ასევე, ვმუშაობთ ალტერნატიული მარშრუტების გახსნაზე, რათა შევამციროთ ჩვენი დამოკიდებულება ამ სტრატეგიულ საზღვაო გზაზე და უზრუნველვყოთ ჩვენი მომარაგება. ნავთობის ტრანსპორტირების მეტი მარშრუტი ნიშნავს ნაკლებ დამოკიდებულებას. ნაკლები დამოკიდებულება ნიშნავს მეტ უსაფრთხოებას. მეტი უსაფრთხოება კი ფასებზე ნაკლებ ზეწოლას ნიშნავს. დაძაბულობის შემცირება, ნავთობის მომარაგების უზრუნველყოფა, საწვავის ფასებზე ზეწოლის შემსუბუქება – ეს ყველაფერი ფრანგების დაცვის ნაწილია“, – წერს მაკრონი.