მთავარი გარანტი ყველაფრის არის ქართველი ხალხი და სწორედ ქართველ ხალხს მისცა ბიძინა ივანიშვილის პოლიტიკაში შემოსვლამ იმის საშუალება, რომ ეს სრულიად არასუვერენული და ავტორიტარული ხელისუფლება ჩაებარებინა წარსულისთვის და შეექმნა ის სისტემა, რომელიც არის დღეს უამრავი შედეგით გამორჩეული, – ამის შესახებ საქართველოს პრემიერ-მინისტრმა ირაკლი კობახიძემ „ღია ეთერში“ განაცხადა.
როგორც მთავრობის მეთაურმა აღნიშნა, ადამიანების მიმართ მოპყრობა, ღირსება არის უპირველესი და ეს არის გამოხატული ყველა იმ შემთხვევასთან მიმართებით, რომელიც შეიძლება, იყოს განსახილველი.
„რაც შეეხება არის თუ არა ერთი ადამიანი ამ ქვეყანაში სუვერენიტეტისა და უსაფრთხოების გარანტი, ჩვენ ყოველთვის ვამბობთ ხოლმე, რომ მთავარი გარანტი არის ბიძინა ივანიშვილი, როგორც ჩვენი პოლიტიკური გუნდის ლიდერი. არასდროს არ გვითქვამს ის, რომ ერთი ადამიანი არის გარანტი. გარანტი არის ბიძინა ივანიშვილი როგორც ამ გუნდის პოლიტიკური ლიდერი, გარანტი არის პირველ რიგში ქართველი ხალხი, არავინ არ შეიძლება იყოს გარდა ქართველი ხალხისა მშვიდობისა და უსაფრთხოების გარანტი. ყველაფერი, რასაც მივაღწიეთ, არის მიღწეული მხოლოდ ქართველი ხალხის თანადგომით და შესაბამისად, მთავარი გარანტი ყველაფრის არის ქართველი ხალხი და სწორედ ქართველ ხალხს მისცა ბიძინა ივანიშვილის პოლიტიკაში შემოსვლამ იმის საშუალება, რომ ეს სრულიად არასუვერენული ხელისუფლება და ავტორიტარული ხელისუფლება ჩაებარებინა წარსულისთვის და შეექმნა ის სისტემა, რომელიც არის დღეს უამრავი შედეგით გამორჩეული. შემიძლია ეს შედეგებიც გაგაცნოთ.
რაც შეეხება ადამიანების მიმართ მოპყრობას, ღირსება არის უპირველესი და ეს არის გამოხატული ყველა იმ შემთხვევასთან მიმართებით, რომელიც შეიძლება, იყოს განსახილველი. ყველა კონკრეტულ შემთხვევაში, ყველას ვეუბნებით, თუ არის კითხვის ნიშნები ოჯახის წევრების მიმართ საკუთარი ოჯახის წევრების შესახებ და ა.შ. ყველას ვეუბნებით, რომ ჩვენ თუ იარსებებს სათანადო მტკიცებულებები, სათანადო ფაქტები, გარემოებები, არავის არ ავარიდებთ პასუხისმგებლობას. ეს არის დამოკიდებულება, რაც პრინციპულად განსხვავდება იმისგან, რაზეც ვსაუბრობდი 2012 წლამდელ პერიოდთან დაკავშირებით. ადამიანის მიმართ დამოკიდებულება, სუვერენიტეტის მიმართ დამოკიდებულება, თავდაცვის მიმართ დამოკიდებულება, საზღვრების მიმართ დამოკიდებულება, ყველგან ვიდგებით იქ, სადაც ეს სჭირდება სუვერენიტეტს, სახელმწიფოსა და ადამიანის ინტერესებს“, – განაცხადა ირაკლი კობახიძემ.