საბერძნეთში, კუნძულ კრეტაზე ძლიერი შტორმია. სტიქიის გამო ათობით ადამიანის ევაკუაცია განხორციელდა. ინფორმაციას საინფორმაციო სააგენტო „ანადოლუ“ ავრცელებს.
მათივე ცნობით, შტორმმა მასშტაბური წყალდიდობა და ნგრევა გამოიწვია.
სტიქიამ ყველაზე მეტად კუნძულის რამდენიმე რაიონი დააზიანა. ძლიერი წვიმების შედეგად მდინარეები ადიდდა და ქუჩები დაიტბორა, რამაც ნანგრევები საავტომობილო გზებზე ჩაიტანა.
გავრცელებული ინფორმაციით, კუნძულის ერთ-ერთ ყველაზე პოპულარულ ტურისტულ ადგილას რვა მუშა ჩარჩა. მედიის ცნობით, მათგან ექვსი საბერძნეთის ბუნებრივი გარემოსა და კლიმატის ცვლილების სააგენტოს თანამშრომელია, ორი – რეინჯერი. როგორც ცნობილია, ისინი სამარიას ხეობაში 29 სექტემბერს შევიდნენ, თუმცა ამინდის პირობების გაუარესების გამო, გამოსვლას ვერ ახერხებენ.
კუნძულზე ევაკუაცია მთავრობის მიერ საგანგებო გაფრთხილების შემდეგ განხორციელდა.