საფრანგეთის პრემიერ-მინისტრმა, სებასტიან ლეკორნუმ საპროტესტო აქციებზე პოლიციის ქმედებები დაიცვა – ინციდენტების შედეგად მოზარდმა ხელის მტევანი დაკარგა, ხოლო მეორემ კი ერთ თვალში მხედველობა დაკარგა.
„პოლიციის მოქმედებას ქალაქში ძალადობის შემთხვევები იწვევს“, – განაცხადა ლეკორნუმ სამშაბათს, პარლამენტში სიტყვით გამოსვლისას. – „შეიძლება თუ არა მოხდეს უბედური შემთხვევები? პასუხია: დიახ“, – დასძინა მან.
ლეკორნუმ უარყო ტერმინი „პოლიციის სისასტიკე“, რადგან მისი თქმით, ეს ტერმინი გულისხმობს, თითქოს სამართალდამცველებს ძალის გამოყენების მითითება ჰქონდათ მიღებული.
ორშაბათს, საფრანგეთის ჩრდილოეთით, 15 წლის მოზარდს ყუმბარის აფეთქებისას ხელი მძიმედ დაუზიანდა. ადგილობრივი პროკურორის თქმით, ჯერ დაზუსტებით ვერ იტყვის, „მოსწავლემ ყუმბარა თავად აიღო თუ მას ესროლეს“.
ქალაქ ტურში კი 16 წლის მოზარდმა ერთ თვალში მხედველობა დაკარგა. მას ჭურვი მოხვდა, რომელიც, პროკურორის ვარაუდით, შესაძლოა პოლიციის მიერ აქციის დასაშლელად გამოყენებული არალეტალური იარაღიდან იყო გასროლილი.