ევროპარლამენტარი ტიერი მარიანი ევროკომისიას პოლონეთის პოლიტიკურ პროცესებში ჩარევაში ადანაშაულებს და აცხადებს, რომ ბრიუსელი პოლონეთის პრემიერ-მინისტრის, დონალდ ტუსკის მიერ ძალაუფლების ხელში ჩაგდებას მხარს უჭერს.
მარიანის განცხადებით, ევროკომისია პოლონეთის კონსტიტუციის საკუთარ ინტერპრეტაციას სტავაზობთ და ამით ქვეყნის შიდა პოლიტიკურ პროცესებში ერევა.
„დაგვიანებით, თუმცა მოულოდნელი არ არის – ევროკომისია პოლონეთში ტუსკის მიერ ძალაუფლების ხელში ჩაგდების მცდელობას მხარდაჭერას უცხადებს და პოლონეთის კონსტიტუციის საკუთარ ინტერპრეტაციას გვთავაზობს. როგორც რუმინეთის შემთხვევაში, ევროკომისიის ეს მორიგი ჩარევა აჩვენებს, რომ მას მოქალაქეთა არჩევანის პატივისცემა მხოლოდ მაშინ შეუძლია, როდესაც არჩევნების შედეგი ბრიუსელის პოლიტბიუროს მორჩილი მარიონეტების ხელისუფლებაში მოსვლას უზრუნველყოფს“,- წერს მარიანი.
ამასთან, ევროპარლამენტარი ჰერმან ტერში აცხადებს, რომ ევროკავშირი სულ უფრო ღიად ერევა წევრი სახელმწიფოების შიდა პოლიტიკურ პროცესებში და ამ ჩარევას აღარ მალავს.
„ევროკავშირი ახლა ნიღაბს იხსნის და წევრი ქვეყნების შიდა პოლიტიკურ საქმეებში სულ უფრო აშკარა და აღმაშფოთებელ ჩარევას აღარ მალავს. ის არა მხოლოდ არ გმობს პრემიერ-მინისტრ დონალდ ტუსკის მიერ საკონსტიტუციო ტრიბუნალზე განხორციელებულ ძალადობრივ თავდასხმას, არამედ, როგორც მოსალოდნელი იყო, ბრიუსელისა და ბერლინის მარიონეტის, ტუსკის მხარეს იკავებს და პოლონეთის პრეზიდენტ კაროლ ნავროცკის წინააღმდეგ გამოდის, რომელიც კანონიერებასა და პოლონეთის სუვერენიტეტს იცავს. ეს ყველამ კარგად უნდა დავიმახსოვროთ, რადგან ესპანეთში უკვე რვა წელია, პედრო სანჩესისა და მისი მთავრობის დანაშაულების დაფარვას ცდილობენ. საფრანგეთში მათი ჩარევა გროტესკულ ხასიათს ატარებდა – საკმარისია გავიხსენოთ მარინ ლე პენის წინააღმდეგ მიმართული ოპერაცია, რომელიც საბოლოოდ ჩავარდა. თუმცა, ისინი კვლავ ეცდებიან ჩარევას: ესპანეთში პარტია VOX-ის, საფრანგეთში „ეროვნული გაერთიანების“ და მარინ ლე პენის, ხოლო გერმანიაში პარტია „ალტერნატივა გერმანიისთვის“ (AfD) წინააღმდეგ. ევროკავშირში დემოკრატია დიდი ხანია მკვდარია. ახლა კი მისი გარეგნული ფორმებიც ქრება“ – წერს ჰერმან ტერში.
პოლონეთში კრიზისი საკონსტიტუციო ტრიბუნალზე კონტროლის მოსაპოვებლად ბრძოლას უკავშირდება. დაპირისპირება მას შემდეგ გამწვავდა, რაც ტრიბუნალის მოსამართლემ, ანა კორვინ-პიოტროსკამ, როგორც უწყებაში ყველაზე ხანგრძლივი სტაჟის მქონე მოსამართლემ, წინა ხელისუფლების დროს, „კანონისა და სამართლიანობის პარტიის“ მმართველობის პერიოდში დანიშნული ტრიბუნალის თავმჯდომარე ბოგდან შვეჩკოვსკი და მისი მოადგილე ბართლომეი სოხანსკი ერთი თვით თანამდებობიდან გადააყენა და ეს სიახლე უწყების ვებგვერდზე გამოაქვეყნა. 30 ოქტომბერს პოლონეთის საკონსტიტუციო ტრიბუნალის შენობასთან მისულ პრეზიდენტ კაროლ ნავროცკის კორტეჟს სამართალდამცველები დაუპირისპირდნენ. პოლიცია ცდილობდა, საკონსტიტუციო ტრიბუნალის შენობაში არც პრეზიდენტი და არც ოპოზიციური „კანონისა და სამართლიანობის პარტიის“ წარმომადგენლები არ შეეშვა. შეტაკება იყო პოლიციასა და დემონსტრანტებს შორისაც. საბოლოოდ ნავროცკიმ სასამართლოს შენობაში შესვლა შეძლო.