უკრაინულმა ძალებმა გვიან ღამით რუსეთის ქალაქ ვოლგოგრადში მდებარე მსხვილ ნავთობგადამამუშავებელ ქარხანასა და დონის როსტოვში საწარმოო ობიექტზე დრონებით იერიში მიიტანეს. ორივე ობიექტზე ხანძარი გაჩნდა, იუწყება უკრაინული მედია.
თავდასხმა აბუ-დაბიში უკრაინას, რუსეთსა და აშშ-ს შორის სამმხრივი სამშვიდობო მოლაპარაკებების გამართვიდან ერთი დღის შემდეგ განხორციელდა. უკრაინა განაგრძობს რუსეთის სამხედრო ინფრასტრუქტურის დაზიანებისა და მოსკოვის ენერგეტიკული შემოსავლების შემცირებისკენ მიმართულ კამპანიას.
მედიის ინფორმაციით, აფეთქებები და ხანძარი კომპანია „ლუკოილის“ კუთვნილ ვოლგოგრადის ნავთობგადამამუშავებელ ქარხანაში დაფიქსირდა. ეს რუსეთის ერთ-ერთი უდიდესი ნავთობგადამამუშავებელი საწარმოა, რომლის წლიური სიმძლავრე 15 მილიონი ტონა ნედლი ნავთობის გადამუშავებას შეადგენს.
ვოლგოგრადის ოლქის გუბერნატორმა ანდრეი ბოჩაროვმა, ქალაქზე „მასშტაბური“ თავდასხმა დაადასტურა. მისი განცხადებით, ხანძარი ქალაქის სამხრეთ ნაწილში, სამრეწველო ზონაში გაჩნდა.
ვოლგოგრადის ნავთობგადამამუშავებელი ქარხანა „ლუკოილის“ ერთ-ერთი უდიდესი საწარმოა. კომპანია რუსეთის ნავთობმოპოვების სექტორში სიდიდით მეორეა. უკრაინულმა ძალებმა ქარხანას მანამდე, 2 ოქტომბერსაც შეუტიეს. საწარმო უკრაინის საზღვრიდან დაახლოებით 400 კილომეტრში მდებარეობს, წერს მედია.
ვოლგოგრადის სამხრეთ-დასავლეთით მდებარე დონის როსტოვზე უკრაინული თავდასხმა როსტოვის ოლქის გუბერნატორმა იური სლიუსარმაც დაადასტურა. მისი ინფორმაციით, დარტყმების შედეგად ხანძარი გაჩნდა საწარმოო ობიექტსა და საწყობში. ჩამოგდებული დრონების ნამსხვრევებმა კი საცხოვრებელი კორპუსი დააზიანა.