ყოფილ მეუღლეზე ძალადობის ფაქტზე ბრალდებულს გამამტყუნებელი განაჩენი გამოუტანეს

თბილისის საქალაქო სასამართლომ ყოფილ მეუღლეზე ძალადობის ფაქტზე ბრალდებულ გ. ხ.-ს მიმართ გამამტყუნებელი განაჩენი დაადგინა.
საქალაქო სასამართლოს ინფორმაციით, გ. ხ.-ს ბრალად ედებოდა ოჯახური ძალადობა, ე.ი. ოჯახის ერთი წევრის მიერ მეორის მიმართ ძალადობა, რამაც გამოიწვია ფიზიკური ტკივილი, რასაც არ მოჰყოლია ამ კოდექსის 117-ე (ჯანმრთელობის განზრახ მძიმე დაზიანება), 118-ე (ჯანმრთელობის განზრახ ნაკლებად მძიმე დაზიანება) და 120-ე (ჯანმრთელობის განზრახ მსუბუქი დაზიანება) მუხლით გათვალისწინებული შედეგი, ჩადენილი არასრულწლოვნის თანდასწრებით მისივე ოჯახის წევრის მიმართ.
საქმის მასალების თანახმად, 2017 წლის 1 მაისს, ბრალდებულმა ყოფილ მეუღლეს არასრულწლოვანი შვილების თანდასწრებით რამდენჯერმე დაარტყა ხელი და წააქცია, რამაც ფიზიკური ტკივილი გამოიწვია. 
საქმის არსებითად განხილვისას ბრალდებულმა თავი არ ცნო დამნაშავედ წარდგენილ ბრალდებაში, თუმცა დაზარალებულისა და მოწმეების ჩვენებების, სამედიცინო ექსპერტიზის დასკვნის, ტრასოლოგიური ექსპერტიზის დასკვნისა და სხვა მასალათა ერთობლიობის შეფასების შედეგად, სასამართლომ გ. ხ. დამნაშავედ ცნო წარდგენილ ბრალდებაში და მას სასჯელის სახედ და ზომად 1 წლისა და 6 თვის ვადით თავისუფლების აღკვეთა შეუფარდა.
სასამართლოს აღნიშნული განაჩენი შეიძლება გასაჩივრდეს გამოცხადებიდან ერთი თვის ვადაში, თბილისის სააპელაციო სასამართლოს სისხლის სამართლის საქმეთა პალატაში.