„შეერთებულ შტატებს, შესაძლოა, არ ჰქონდეს სხვა არჩევანი იმის გარდა, რომ მთლიანად გაანადგუროს ჩრდილოეთ კორეა“, – ამის შესახებ აშშ-ის პრეზიდენტმა, დონალდ ტრამპმა გაეროს გენერალურ ასამბლეაზე სიტყვით გამოსვლისას განაცხადა.
„თუ ჩვენ სხვა არჩევანი არ დაგვრჩება, ამერიკის შეერთებული შტატები იძულებული იქნება გაანადგუროს ჩრდილოეთ კორეის რეჟიმი. ადამიანმა რაკეტამ (კიმ ჩენ ინი) ფაქტობრივად თვითმკვლელობის განაჩენი გამოუტანა საკუთარ თავს“ – განაცხადა დონალდ ტრამპმა.
ტრამპმა ირანი ვალდებულებების უგულებელყოფასა და ტერორისტების მხარდაჭერაში დაადანაშაულა.
„არის კიდევ ერთი ქვეყანა, რომელიც ღიად საუბრობს მასობრივ მკვლელობაზე. ეს არის ირანი, რომელიც განადგურებით ემუქრება ისრაელს, ეს არის მდიდარი წარსულის ქვეყანა, რომელიც წლებია საკუთარ ხალხს ტანჯვაში აცხოვრებს, ქვეყანა, რომელიც აფინანსებს ტერორისტებს, ჰესბოლას და იემენში შეიარაღებულ დაჯგუფებებს და მათი ხელით უდანაშაულო ადამიანებს ხოცავს. ჩვენ არ უნდა შევეგუოთ მკვლელ რეჟიმებს, რომელთაც აქვს ბირთვული პროგრამა“ – აღნიშნა ტრამპმა.