შსს-ს საგანგებო სიტუაციების მართვის სააგენტოს მაშველებმა ვარკეთილში თვითმკვლელობის მცდელობა აღკვეთეს,- ამის შესახებ საგანგებო სიტუაციების მართვის სააგენტოში განაცხადეს.
მათივე ცნობით, მაშველები სამი საათის განმავლობაში ცდილობდნენ დაერწმუნებინათ ახალგაზრდა მამაკაცი საცხოვრებელი კორპუსის მე-9 სართულიდან არ გადამხტარიყო.
„შსს-ს საგანგებო სიტუაციების მართვის სააგენტოში გადაუდებელი დახმარების ოპერატიული მართვის ცენტრ „112“-დან შემოვიდა შეტყობინება, რომ ქალაქ თბილისში, ვარკეთილში, ახალგაზრდა მამაკაცი საცხოვრებელი კორპუსის მე-9 სართულიდან გადმოხტომას აპირებდა.
შეტყობინების მიღებისთანავე, შსს-ს საგანგებო სიტუაციების მართვის სააგენტოს თანამშრომლებმა მყისიერი რეაგირება მოახდინეს და შემთხვევის ადგილზე დაუყოვნებლივ იქნა მობილიზებული სამაშველო ჯგუფი. მაშველები სამი საათის განმავლობაში ცდილობდნენ, დაერწმუნებინათ ახალგაზრდა მამაკაცი, არ გადამხტარიყო.
პარალელურად, ისინი შევიდნენ საცხოვრებელ ბინაში და მამაკაცი ფანჯრის გასწვრივ არსებული რკინის კონსტრუქციიდან, სამაშველო თოკის დახმარებით უვნებლად ჩამოიყვანეს“,- აღნიშნულია საგანგებო სიტუაციების მართვის სააგენტოს ინფორმაციაში.