საქალაქო სასამართლოში სანდრო გირგვლიანის მკვლელობის საქმეზე დღეს პროკურატურის ოთხი მოწმე დაიკითხა.
როგორც საქმის პროკურორმა ლაშა ცქვიტარიამ ჟურნალისტებს განუცხადა, დღევანდელ პროცესზე მოწმეების ჩვენებიდან გაირკვა, რომ 2006 წელს, „ნაციონალური მოძრაობის“ ხელისუფლების მმართველობის დროს გირგვლიანის საქმეზე ჩატარებული გამოძიება არასწორად მიმდინარეობდა.
„დღევანდელ პროცესზე სახელმწიფო ბრალდების ოთხი მოწმე დაიკითხა. მათ დეტალურად აღწერეს სანდრო გირგვლიანის სხეულზე მიყენებული ჭრილობები. დაიკითხა 2 მოწმე, რომლებმაც დაადასტურეს, რომ 2006 წელს ჩატარებული გამოძიება ტენდენციური და მიკერძოებული იყო“, – განაცხადა ლაშა ცქვიტარიამ.
სანდრო გირგვლიანის საქმეზე კუდ-ის ყოფილ დირექტორს დათა ახალაიას ბრალი სამსახურებრივი უფლებამოსილების გადამეტებასა და თავისუფლების უკანონოდ აღკვეთაში აქვს წაყენებული. ის ქართველი სამართალდამცველების მიერ იძებნება.