თბილისის მერიის ყოფილი მაღალჩინოსნის ოთარ აბესაძის სასამართლო პროცესი დღეს განახლდება. 27 სექტემბერს პროცესი მისი ჯანმრთელობის მდგომარეობის გამო გადაიდო.
როგორც ბრალდებულმა განაცხადა, მისი ჯანმრთელობის მდგომარეობიდან გამომდინარე, ის ვერ მოახერხებდა პროცესზე დასწრებას, შესაბამისად, შუამდგომლობა დააყენა პროცესის გადადების შესახებ.
ბრალდებულის შუამდგომლობა გაიზიარა როგორც ბრალდების მხარემ, ასევე მოსამართლე ნინო ნაჭყებიამ. მისი განცხადებით, ოთარ აბესაძის ჯანმრთელობის შესახებ ცნობილი გახდა საბადრაგო სამსახურიდან მიღებული ინფორმაციით.
„ბრალდებულის მოთხოვნა საფუძვლიანია. საბადრაგო სამსახურიდან ცნობილი იყო, რომ ბრალდებული შეუძლოდ იყო, მთელი დღის მანძილზე ის საექსპერტო ბიუროში იმყოფებოდა. რათა არ მოხდეს ბრალდებულის გადაღლა და სამართლიან სასამართლო პირობებში ჩატარდეს სხდომა, საფუძვლიანია დაკმაყოფილდეს ოთარ აბესაძის მოთხოვნა“, – განაცხადა მოსამართლე ნინო ნაჭყებიამ 27 სექტემბრის სხდომაზე.