უკრაინის შსს: დეპუტატის აფეთქების კვალი კადიროვამდე მიდის

უკრაინის შსს-ში ვარაუდობენ, რომ რადას დეპუტატზე, იგორ მოსიჩუკზე თავდასხმაში „რუსული კვალი“ იკვეთება, მისი ლიკვიდაციით კი ჩეჩნეთის ლიდერი რამზან კადიროვი იყო დაინტერესებული. ამის შესახებ ტელეკომპანია „112 უკრაინას“ შსს-ს ხელმღვანელის მრჩეველმა ივან ვარჩენკომ განუცხადა.
მისი თქმით, კადიროვს შესაძლოა აფეთქებასთან კავშირი ჰქონდეს, რადგან 2014 წელს ის დეპუტატს ღიად ემუქრებოდა. „შესაძლოა ბევრი ვარიანტი იყოს, თუმცა შემკვეთი რუსეთის ფედერაციაა. არის კონკრეტული მტკიცებულებები იმისა, რომ არსებობს კონკრეტული დაინტერესება, მათ შორისაა კადიროვის 2014 წლის განცხადებები, რომლებშიც, ის პირდაპირ ამბობდა მოსიჩუკის და მისი კოლეგების მკვლელობის გეგმების შესახებ. გამოძიება სხვა ვერსიებსაც განიხილავს, თუმცა მე ვფიქრობ, რომ მტკიცებულებათა ბაზა ახლა საკმარისია იმისთვის, რომ პრიორიტეტულად ჩაითვალოს სწორედ რუსული დაკვეთის ვერსია”, – განაცხადა ვარჩენკომ.
მოსიჩუკის თანაპარტიელი იური ჩიჟმარი კი თვლის, რომ მისი მკვლელობის დამკვეთი უკრაინაში უნდა ეძებონ. მისი აზრით, რუსულ კვალთან ერთად პარალელურად უკრაინულიც უნდა განიხილონ, თუმცა მას არ სჯერა, რომ საუბარი შეიძლება შეეხოს მოსიჩუკის კოლეგებს პარლამენტის სხვა ფრაქციებიდან.
რადას რადიკალური პარტიის წევრი ვასილი ამელჩენკო კი მიიჩნევს, რომ თავდასხმა შესაძლოა, საარჩევნო კამპანიას უკავშირდებოდეს, რადგან მოსიიჩუკი ძალიან აქტიურად მუშაობდა სატელევიზიო ეთერებშიც და ოლქებშიც. თუმცა ის აღნიშნავს, რომ მაინც ტერაქტის ვერსია უფრო მყარია.