საქართველოს ნაკრების ლიდერმა, ეტლით მოფარიკავე ირმა ხეცურიანმა იტალიაში წარმატებით იასპარეზა და ბ-ჯგუფში მსოფლიოს ჩემპიონის ტიტული მოიპოვა.
იტალიის დედაქალაქი რომი 7-12 ნოემბერს პარამოფარიკავეთა მსოფლიოს პირველობას მასპინძლობს, სადაც მედლებისთვის ქართველი სპორტსმენებიც იბრძვიან.რომში მიმდინარე გათამაშებაში, პარასპორტსმენმა ჯგუფში ბერძენი, ფრანგი, იტალიელი და უკრაინელი სპორტსმენები დაამარცხა.
სპორტის სამინისტროს ინფორმაციით, ნახევარფინალში გასასვლელ ორთაბრძოლაში, პოლონელ მოფარიკავეს იადვიგ პაჩეკს 15-6 მოუგო. ასევე პოლონელი პატრისია ჰარეზა კი ნახევარფინალში 15-10 დაამარცხა. ფინალში, ირმა ხეცურიანი ტაილანდელ სპორტსმენს შეხვდა და დამაჯერებელი ანგარიშით 15-10 მოუგო.
აღსანიშნავია, რომ ირმა ხეცურიანი, კომპანია BP-ის ელჩია საქართველოში და წარმატებით ასპარეზობს სხვადასხვა სართაშორისო ტურნირებზე – წელს ხეცურიანმა მსოფლიოს თასის ეტაპებზე და საერთაშორისო ტურნირებზე არაერთი მედალი მოიპოვა. დღეს, 8 ნოემბერს, ხეცურიანი რაპირით ფარიკაობაში ბ-კატეგორიაში იასპარეზებს, ა-კატეგორიაში კი მედლისთვის ახალგაზრდებს შორის მოქმედი ჩემპიონი, ნინა თიბილაშვილი იბრძოლებს.