მიქაელ ბოტკოველი: დავაპატიმროთ ეს მღვდლები თუ რა გავაკეთოთ?!

ყვარლის მუნიციპალიტეტის სოფლებში სასულიერო პირების მიერ კანფეტების გადმოყრის ფაქტთან დაკავშირებით ატეხილ აჟიოტაჟს პატრიარქის მდივანი მიქაელ ბოტკოველი გადამეტებულს უწოდებს.
შესაბამისი კომენტარი მან „კვირასთან“ საუბარში გააკეთა:
“რა დაშავდა, მღვდლებმა ბავშვებს კანფეტები აჩუქეს, რა მოხდა მერე, შეიძლება რაღაცა ნორმებში არ ჯდებოდეს, მაგრამ დავაპატიმროთ ეს მღვდლები თუ რა გავაკეთოთ?!“, – აღნიშნა მიქაელ ბოტკოველმა.
შსს-ს სასაზღვრო პოლიციის ვერტმფრენით, გრემის მონასტრის სასულიერო პირებმა, ყვარლის მუნიციპალიტეტის სოფლების: შილდის, გრემის, ენისელის, ალმატის და საბუეს სკოლებში, მოსწავლეებს ვერტმფრენიდან ნაკურთხი კანფეტები ჩამოუყარეს.
გაურკვეველი სახელწოდების აქცია კახეთის სკოლებში სასწავლო პროცესის დროს, დიდ დასვენებაზე განხორციელდა.
მომხდართან დაკავშირებით, შსს-ს სასაზღვრო პოლიციის სპეციალური დანიშნულების ავიაციის მთავარი სამმართველოს უფროსის მოვალეობის შემსრულებელს სამსახურებრივი უფლებამოსილება შეუწყდა.