მიტროპოლიტი შიო მუჯირის პატრიარქის მოსაყდრეს დანიშვნას ჩინეთში საქართველოს ყოფილი ელჩი მამუკა გამყრელიძეც აფასებს.
”მეუფე შიოს მესაყდრეობაზე მიდის დიდი ბჭობა. ორიოდ სიტყვას მეც მოგახსენებთ.
მოსკოვში ვცხოვრობდი წლების განმავლობაში და ქართულ ეკლესიაშიც დავდიოდი, მითუმეტეს ჩემი სახლიდან ახლოს იყო. დიდი საეკლესიო განათლებით ვერ გამოვირჩევი და ცხადია კითხვებიც მაწუხებდა.
ჰოდა, ერთხელაც ასეთი კითხვებით მივადექი ახალჩამოსულ მოძღვარს. სასიამოვნო მოსაუბრე გამოდგა. განათლებული და მშვიდი ადამიანი. ჩემი კითხვები რომ მოისმინა, მითხრა ჯერ ერთი წიგნი წაიკითხე და თუ კიდევ გექნება კითხვები მერე მკითხეო. იოანე დამასკელის წიგნი მომცა წასაკითხად. რაღა დაგიმალოთ და წავიკითხე. ბევრი რომ ვერაფერი გავიგე მივხვდი, რომ ან უნდა იწამო ან მეცნიერებას მიხედო…
ის მოძღვარი გახლავთ სწორედ მეუფე შიო. მას მერე არ მინახია, მაგრამ დღემდე მადლობელი ვარ მისი იმ არაჩვეულებრივი რჩევისთვის. საერთოდ, მოსკოვის ეკლესიას გაუმართლა იმით, რომ გამორჩეული მოძღვრები ჩამოდიოდნენ თბილისიდან. მამა მიქაელ ქადაგიშვილი, მეუფე ვახტანგ ლიპარტელიანი. მათი შესანიშნავი მოღვაწეობით გაიზარდა და გაძლიერდა ქართული სათვისტომო და ეკლესიის მრევლი.
სიტყვა გამიგრძელდა და წარმატებას ვუსურვებ მეუფე შიოს. განათლებულ და კეთილმოსურნე ადამიანს!”, – აღნიშნავს მამუკა გამყრელიძე.
