“ჟურნალისტებმა არ უნდა მისცენ თავიანთ თავს იმაზე მეტის უფლება, ვიდრე ჟურნალისტის ეთიკა აძლევს ამის შესაძლებლობას”

ჟურნალისტის უფლებები უნდა იყოს დაცული და არც ჟურნალისტებმა უნდა მისცენ თავიანთ თავს იმაზე მეტის უფლება, ვიდრე ჟურნალისტის ეთიკა აძლევს ამის შესაძლებლობას, – ასე გამოეხმაურა ვიცე-პრემიერი, ეკონომიკისა და მდგრადი განვითარების მინისტრი დიმიტრი ქუმსიშვილი „რუსთავი 2“-ის გადამღებ ჯგუფსა და მოქალაქეს შორის აეროპორტში მომხდარ ფიზიკურ დაპირისპირებას.
დიმიტირ ქუმსიშვილი დარწმუნებული, რომ შინგან საქმეთა სამინისტრო უმოკლეს ვადაში მოიკვლევს აეროპორტში მომხდარ შემთხვევას.
„ერთმნიშვნელოვნად ჟურნალისტის უფლებები უნდა იყოს დაცული და ამავდროულად არც ჟურნალისტებმა უნდა მისცენ თავიანთ თავს იმაზე მეტის უფლება, ვიდრე ჟურნალისტის ეთიკა აძლევს ამის შესაძლებლობას. მე დარწმუნებული ვარ, რომ შინაგან საქმეთა სამინისტრო უმოკლეს ვადაში მოიკვლევს ამას და შესაბამისად დადგება ის შედეგები, რომელიც უნდა დადგეს“, – განაცხადა დიმიტრი ქუმსიშვილმა.
შსს-ს საპატრულო პოლიციის თანამშრომლებმა თბილისის საერთაშორისო აეროპორტში ცემის ფაქტზე ერთი პირი გამოავლინეს. უწყების ინფორმაციით, თბილისის საერთაშორისო აეროპორტის მოსაცდელ დარბაზში, მას შემდეგ, რაც ტელეკომპანია „რუსთავის 2“-ის გადამღებმა ჯგუფმა პროფესიული საქმიანობა დაასრულა, აღნიშნული ტელეკომპანიის ოპერატორ გიორგ ც.-ს მოქალაქე ალექსანდრე ს.-მ სიტყვიერი შეურაცხყოფა მიაყენა და შემთხვევის ადგილს გაეცალა. გამოძიებით დადგინდა, რომ მას გიორგი ც. დაედევნა და ფიზიკური შეურაცხყოფა მიაყენა, რის შემდეგაც მათ შორის სიტყვიერი და ფიზიკური დაპირისპირება დაიწყო. ”კონფლიქტის ადგილზე ამ დროს იმყოფებოდნენ ტელეკომპანია „რუსთავი 2“-ის ჟურნალისტი და საქართველოს პარლამენტის ერთ-ერთი წევრი. ამ უკანასკნელის განცხადებით, როდესაც იგი მობილური ტელეფონით ცდილობდა კონფლიქტის გადაღებას, ალექსანდრე ს.-ს თანმხლებმა ქალბატონმა თამარ ლ.-მ, პროტესტის ნიშნად, მას სიტყვიერი და ფიზიკური შეურაცხყოფა მიაყენა. პარლამენტარმა სამედიცინო დახმარებაზე უარი განაცხადა. სამართალდამცველებმა ცემის ფაქტზე 1970 წელს დაბადებული თამარ ლ. გამოავლინეს. რაც შეეხება გიორგი ც.-ს და ალექსანდრე ს.-ს, ორივე პირი გამოკითხულია და წინასწარი მონაცემებით, მათ ერთმანეთის მიმართ პრეტენზია არ გააჩნიათ,- ნათქვამია შსს განცხადებაში.
აღნიშნულ ფაქტთან დაკავშირებით გამოძიება სსკ-ს 125-ე მუხლით (ცემა) მიმდინარეობს.