თბილისის ზოოპარკმა 10 წლის ხაშურელ ბიჭს, რომელიც 2 დღის წინ სახლიდან 130 კილომეტრში ზოოპარკის სანახავად გამოიპარა, 1-წლიანი უფასო აბონემენტი აჩუქა.
“პატრული დაპირდა გიორგის, რომ აუცილებლად წაიყვანდა ზოოპარკში, შესაბამისად, დღეს ის ჩვენთან მოიყვანეს” – გვითხრა ზოოპარკის დირექტორის ასისტენტმა ხატია ბასილაშვილმა.
გიორგის ზოოპარკის დირექტორი ზურაბ გურიელიძეც შეხვდება და მას თავად დაათვალიერებინებს ვოლიერებს, შემდეგ კი ცხოველების ზოოპარკში გამოკვების პროცესსა და შიდასამზარეულოს გააცნობს.
გიორგის თბილისის ზოოპარკი მეგობრობის სიგელსა და 1-წლიან აბონემენტს აჩუქებს.
“ჩვენ ამ ნაბიჯით ასეთ ქცევას არ ვახალისებთ, უბრალოდ გვინდა მშობლებს მივაწვდინოთ ჩვენი ხმა, რომ გამონახონ დრო, ბავშვები ზოოპარკში წაიყვანონ და ასეთი შემთხვევები აღარ განმეორდეს” – უთხრა On.ge-ს ხატიამ.
როგორც ცნობილია, გიორგი სახლიდან დაუკითხავად გამოიპარა, მატარებელს გამოჰყვა და თბილისში ჩამოვიდა. გიორგი ამბობდა, რომ დიდი ხანია, ზოოპარკის ნახვა უნდოდა და თბილისშიც ამ მიზნით ჩამოვიდა.
ბავშვს თბილისში დააღამდა. ქუჩაში მარტო მიმავალი ბიჭი პატრულის თანამშრომლებმა შეამჩნიეს და გამოელაპარაკნენ. გიორგი ხაშურში მალევე დააბრუნეს.
ახლა გიორგის 1-წლიანი უფასო აბონემენტი აქვს.
www.on.ge