ბუტა რობაქიძის საქმეზე დაკავებულთან შესაძლოა, საპროცესო შეთანხმება გაფორმდეს

ბუტა რობაქიძის საქმეზე დაკავებული ზურაბ ბაქრაძის მიმართ, შესაძლოა, საპროცესო შეთანხმება გაფორმდეს. ამის შესახებ ჟურნალისტებს მისმა ადვოკატმა ზაზა შანავამ განუცხადა.
ადვოკატი ამ წუთებში გლდანის ციხეში თავის დაცვის ქვეშ მყოფს ხვდება.
უფლებადამცველი მიიჩნევს, რომ ბაქრაძის მხრიდან, საქართველოში დაბრუნება და ბრალის აღიარება შემამსუბუქებელი გარემოებაა.
“შემამსუბუქებელი გარემოებაა ის, რა განცხადებაც გააკეთა. მისი საქმე ცალკე გამოიყოფა მხოლოდ იმ შემთხვევაში, თუ მოხდება მის მიმართ სხვა რაიმე საპროცესო ღონისძიების გატარება. ამ საკითხზე საუბარი ჯერ არ გვქონია. შესაძლებელია, ეს იყოს საპროცესო შეთანხმებაც”,– განაცხადა ზაზა შანავამ.
ადვოკატის ინფორმაციით, დაცვის მხარე უახლოეს პროცესზე აღკვეთის ღონისძიების შეცვლის საკითხსაც დააყენებს.
“5 წლის განმავლობაში არ მქონია მასთან საუბარი, კომუნიკაცია. ბრალდებასთან დაკავშირებულ ყველა საკითხზე მოგვიწევს მსჯელობა. კითხვები მაქვს ზოგადად საქმის ირგვლივ. მისი ტელევიზიით გაკეთებული განცხადება და ჩამოსვლაც ემსახურება იმას, რომ ითანამშრომლოს გამოძიებასთან. ნუ დავარქმევთ მის უცხოეთში ყოფნას გაქცევას. სანამ ბრალს წაუყენებდნენ, ის დიდი ხნით ადრე იყო ქვეყნიდან გასული. გამოიებასთან მას ჩამოსვლამდე არანაირი კომუნიკაცია არ ჰქონია”,- აღნიშნა ადვოკატმა.