სანდრო ახმეტელის სახელობის თეატრის სამხატვრო ხელმძღვანელ ირაკლი გოგიას ემუქრებიან და იმ პროექტის შეჩერებას ითხოვენ, რომელშიც ქართველი და აფხაზი მსახიობები ერთობლივად მონაწილეობენ.
სამხატვრო ხელმძღვანელის განცხადებით, აღნიშნული პროექტის მიზანია ქართულ-აფხაზური კონფლიქტის საკითხებში სახალხო-კულტურული დიპლომატიის ჩართვა, რასაც მისთვის უცნობი პირები ეწინააღმდგებიან და პროექტის შეწყვეტის მოთხოვნით მუქარის შემცველ შეტყობინენებს უგზავნიან.
ამ საკითხთან დაკავშირებით ახმეტელის თეატრის დასი განცხადებას ავრცელებს.
„ჩვენი თეატრი კონფლიქტების ტრანსფორმაციის პროცესში, რომელშიც მონაწილეობა მიიღეს მთელი სამხრეთ კავკასიის წარმომადგენლებმა. ოსლოს მშვიდობის ინსტიტუტის დამაარსებლის იოჰან გალტუნგის სიტყვებით ეს იყო 1992 წლის მერე ყველაზე წარმატებული სამშვიდობო პროექტი, რომელმაც გამოიწვია ქართველების და აფხაზების სერიოზული დაახლოება შემოქმედებითი პროცესის ირგვლივ.
ჩვენი ქმედებები იყო სრულიად გამჭვირვალე და არანაირად არ იყო პოლიტიკურად ანგაჟირებული პროცესის ნაწილი. ჩვენ ყველგან ხაზს ვუსვამდით, რომ ეს არის ადამიანური ურთიერთობის აღდგენის პროცესი. ამ პროცესში ჩვენი მედიატორი ინდოეთის მაჰათმა განდის ფონდი.
ირაკლი გოგიამ მის კოლეგებთან ერთად ეს პროცესი ძალიან წარმატებულად წარმართა. რასაც ხელშესახები შედეგები მოჰყვა. აფხაზები მეგობრულად ჩაერთნენ პროექტში, ეს უაღრესად პოზიტიურად შეაფასეს მსოფლიოში იმ დარგის წამყვანმა სპეციალისტებმა და მშვიდობის დარგის ყველაზე ავტორიტეტულმა საერთაშორისო ორგანიზაციებმა. ამ პროცესის ფონზე ძალიან საგანგაშოა რომ ირაკლი გოგიას მისამართით დღეს პრემიერამდე რამდენიმე საათით ადრე გაისმა კონკრეტული მუქარები სმს-ების სახით. მანამდეც ჰქონდა მუქარებს ადგილი. თეატრის სამხატვრო ხელმძღვანელს მოუწოდებენ, აფხაზებთან ურთიერთობებს თავი დაანებოს.
ჩვენ, ახმეტელის თეატრის დასი ვდგავართ სამხატვრო ხელმძღვანელის გვერდით. მოვუწოდებთ სამართალდამცველ ორგანოებს, რომ გამოიძიონ ვინ დგას ამ მუქარის უკან და რა ჯგუფების ინტერესებში შეიძლება შედიოდეს ირაკლი გოგიას ასე დაშინება.
ჩვენ გვაქვს ეჭვი, რომ ვიღაც არ გვპატიობს აფხაზებთან შემრიგებლურ პოლიტიკას. შესაძლოა, ეს იყოს ოკუპირებულ საზღვარზე კონტრაბანდაში ჩაბმული რუსული სპეცსამსახურების კვალი!
ჩვენ ძალიან დიდი იმედი გვაქვს ქართული სახელმწიფოსი და ხელისუფლების გვერდში დგომის, ვინაიდან ის რასაც ვაკეთებთ ჩვენ, არის დიდი ნაბიჯი წინ საქართველოში პოზიტიური მშვიდობის დამყარებისთვის.
დიდი იმედი გვაქვს, რომ გამოძიება დაადგენს ამ მუქარის ავტორებს და ნათელს მოჰფენს ამ სიტუაციას“,- ნათქვამია განცხადებაში.