მოძრაობა “ახალი საქართველოსთვის” დამფუძნებელი მერაბ შათირიშვილი ერთსქესიანთა ქორწინების თემაზე, ქვემო ქართლში, აზერბაიჯანელი მოსახლეობის პოზიციის შესახებ სოციალურ ქსელში წერს.
“დღეს ქვემო ქართლის სოფლებში გახლდით, აღფრთოვანებული დავრჩი აზერბაიჯანელი მოსახლეობის მხარდაჭერით – რეფერენდუმთან დაკავშირებით – მათთვის წარმოდგენითაც შეუძლებელია ერთსქესიანთა ქორწინება, კეთილი შურით ვუსმენდი მოძმე ხალხის დამოკიდებულებას: – ოჯახი მხოლოდ კაცისა და ქალის ნებაყოფლობითი ერთობაა!.. როცა ამ ფრაზას ვამბობდი, გაოცებით მეკითხებოდნენ: აბა, სხვაგვარად როგორ შეიძლება?!
აფერუმ, ჩვენს მოძმე, მუსლიმ ქვემო ქართლელებს, ნოვატორული პათოსით ინაწილებდნენ სარეფენდუმო ბარათებს და მთელი ეთნიკური დასახლების ხელმოწერების დაფიქსირების პირობას დებდნენ!..
და, ისინი, მინდვრებში თავწარგულნი შრომობენ და ამ პირობას მაინც პირნათლად შეასრულებენ – ქედს ვიხრი მათ წინაშე, გაუმარჯოთ მათ!..
ჩვენ კი, ქართველები, რესტორანებში მოვკალათდეთ, რიხიანად შევსვათ პატრიოტიზმისა და მამულიშვილობის სადღეგრძელო, ამასობაში შემოგვეპარება „ბიძია თომას“ დირექტივა: მთელ მსოფლიოს ვაიძულებთ, ერთსქესიანთა ქორწინების დაკანონებას!.. და მერე, ვუყაროთ კაკალი, მარტო „ყანწიღა“ რომ შეგვჩება ხელში და გაურკვეველი სქესის „რძალ-სიძე“ შემოგვივა სახლში, ეეე, მერე გაგვახსენდეს რანი ვყოფილვართ!..”, – წერს მერაბ შათირიშვილი.