საქართველოს ჟურნალისტური ეთიკის ქარტიის საბჭოს გადაწყვეტილებით, გადაცემა P.S.-ის წამყვანს ჟურნალისტური ეთიკის ქარტიის მე-7 პრინციპი არ დაურღვევია. ინფორმაციას გამოცემა “ლიბერალი” ავრცელებს.
“მე-7 პრინციპის თანახმადაც, „ჟურნალისტს უნდა ესმოდეს მედიის მიერ დისკრიმინაციის წახალისების საფრთხე; ამიტომ ყველაფერი უნდა იღონოს ნებისმიერი პირის დისკრიმინაციის თავიდან ასაცილებლად რასის, სქესის, სექსუალური ორიენტაციის, ენის, რელიგიის, პოლიტიკური და სხვა შეხედულებების, ეროვნული ან სოციალური წარმოშობის საფუძველზე ან რაიმე სხვა ნიშნით.”
განმცხადებელს, თორნიკე კაკალიშვილს მიაჩნდა, რომ 18 მარტს გადაცემა P.S.-ის ერთ-ერთი სიუჟეტის წარდგენისას იესოს შესახებ წამყვანმა ტექსტით „მასხარად აიგდო და, ფაქტობრივად, ფეხქვეშ გათელა წმინდა სახარება და მთელი ქრისტიანული სწავლება/ღვთისმეტყველება. გაბუნიამ ათობით ათასი ტელემაყურებლის წინაშე, პირდაპირ ეთერში, აგდებულად მოიხსენია კაცობრიობის მხსნელი, ჩვენი უფალი-ღმერთი იესო ქრისტე და წაახალისა ქრისტიანთა რელიგიური ნიშნით დისკრიმინაცია”. – ნათქვამია განცხადებაში.