„მამინაცვალმა ვეფხია ბაქრაძემ გერს, გულმკერდისა და ყელის არეში, დანით მრავლობითი ნაკვეთ-ნაჩხვლეტი ჭრილობა მიაყენა“, – ამის შესახებ ნათქვამია თბილისის სასამართლოს მიერ გავცელებულ განცხადებაში, სადაც ახალგაზრდა გოგონას განსაკუთრებული სისასტიკით ჩადენილ მკვლელობაში ბრალდებულს ვეფხია ბაქრაძეს და მის მეგობარს წინასწარი პატიმრობა შეეფარდათ.
თბილისის საქალაქო სასამართლოს მიერ გავრცელებულ განცხადებას უცვლელად გთავაზობთ.
„განსაკუთრებული სისასტიკით ჩადენილი მკვლელობისა და დანაშაულის შეუტყობინებლობისთვის ბრალდებულ ორ პირს თბილისის საქალაქო სასამართლომ აღკვეთის ღონისძიების სახედ პატიმრობა შეუფარდა.
წარდგენილი ბრალდების თანახმად, ვ.ბ.-ს ბრალად ედება, ოჯახის ერთი წევრის მიერ ოჯახის მეორე წევრის განზრახ მკვლელობა განსაკუთრებული სისასტიკით. ხოლო, თ.ბ.-ს ბრალად ედება დანაშაულის შეუტყობინებლობა, იმის მიერ ვინც ნამდვილად იცის, რომ ჩადენილია განსაკუთრებით მძიმე დანაშაული.
საქმე ეხება 2018 წლის 13 აპრილს ქ. თბილისში, ბარნოვის ქუჩაზე არასრულწლოვანი შვილების თანდასწრებით ახალგაზრდა ქალის მკვლელობის ფაქტს. მამინაცვალმა ვ.ბ.-მ გერს, გულმკერდისა და ყელის არეში, დანით მრავლობითი ნაკვეთ-ნაჩხვლეტი ჭრილობა მიაყენა. თ.ბ.-მ მომხდარი, განსაკუთრებით მძიმე დანაშაულის შესახებ სამართალდამცავ ორგანოებს არ შეატყობინა.
სასამართლომ ადამიანის სიცოცხლის წინააღმდეგ მიმართული დანაშაულის შესაძლო ჩადენისათვის ბრალდებულს აღკვეთის ღონისძიების სახედ პატიმრობა შეუფარდა.
სასამართლომ მიიჩნია, მხოლოდ ბრალდებულთა პატიმრობაში ყოფნის შემთხვევაში მიიღწევა აღკვეთის ღონისძიების მიზნები. კერძოდ თავიდან იქნება აცილებული მათი მხრიდან მტკიცებულებათა მოპოვებაში ხელის შეშლის, ახალი დანაშაულის ჩადენის და ვ. ბ.-ს მხრიდან მიმალვის რისკები და საფრთხეები.
წინასასამართლო სხდომა გაიმართება 2018 წლის 6 ივნისს 11 საათზე – ნათქვამია სასამართლოს მიერ გავრცელებულ განცხადებაში.